- Mahmuaka Chhakchhuak
Mizote hi taima tak leh mahni intodelh tak kan ni reng thin a, buh leh balah kher phei hi chuan engemaw chhiatna a thleng thar thut te a nih loh chuan intodelh loh kum hi kan nei tak tak kher awm lo e. Thlawhhma neih chu mitin eizawnna ber a niin kumtluanin lo lamah nitin an feh thin a, hnathawh a sawt zawkna atan tiin a thente chu an ‘inlawm’ bawk thin. Mizo tawngah pawh ‘saihlum leh tha ba a nget ngai lo’ an lo ti mathlawn lo a, saihlum chu lei hrualmum a nih miau avangin a nget thei lo hrim hrim a, chutiang bawkin tha ba pawh rei tak hnuah pawh a danglam thei chuang loin a hlut ngaiin ala hlu reng tho tihna a ni ber awm e. Hetianga thlawhhma neihnaah hian Buh hi mitin chin ber a niin Buh karah thlai dangte chu an ching chauh thin a, a thente chuan a hran deuhin vaihlote an ching bawkin Ba hmunte pawh an siam bawk thin.
Favang (September leh October vel) ah thlawhhma chu hnathawh ngai tawh lo tura zawh a ni thin a, November thla chawhnu lam atang velin buh seng turin lo lamah an kal leh thin a, chumi inkar chu ‘Favang Awllen’ hun niin mi thenkhatte chuan thing tuah tur lakna atante pawh an hmang bawk. December thlaah hi chuan mitinin lo lamah buh leh thlairahte sengin hun an hmang tawh a, Hruih siamin chutah chuan Buh vuak a niin mi thenkhatte chuan Fasuar ah Buh chu an chil bawk a. Chutianga an buh tharte hi In lamah Zem siamin an chhungkhawm a, chu chu kumtluanin rin pui bera an neih a ni. Mitin chuan kumkhat ei tur hi an thar tlangpui a, engemaw harsatna neite chauh lo chuan buh leh balah hian intodelh an tum ngei ngei thin a ni. Hei hi tunhma lama kan pi leh pute eizawnna ber a niin vawiin thleng pawha mi tam takin eizawnna ber atana an la neih dan chu a ni.
Hetianga kan pi leh pute’n kumtluana intodelhna tura thlawhhma an nei thin ang hian tunlai hunah erawh kawng hrang hrangin intodelhna kan neiin kan buaipui hlawm a, a thente chu an tluang deuhin sum leh pai pawh an la lut hnem deuh a, a thente chu tluang vak loin an beisei an phah chiah lo bawk a. Chutianga mahni kawng theuhahte chuan kan peng darh ta sung sung mai hlawmin thenkhatahte hi chuan kan intodelh hlawm viau mai. Heng Zai lamahte, Fiamthu thawh lamahte leh Lirthei khalh lamahte hi chuan intodelh tak kan ni zawk mai thei a. Pathianthu sawi thei pawh hi kan ngah hlawm viau bawk awm e. Chutiang zelin ram hmangaihtu pawh kan neih belh mawlh mawlh emaw tih tur a ni a, tunah tak phei chuan duh aia tam mah kan nei zawk hialin a rinawm. Heng kan intodelhnate hi erawh chu kan ram hian a thatpui nge a thatpui chiah lo tih erawh mahniin lo ngaihtuah chhunzawm ta theuh zawk ila.
Social media lamah ngei pawh tawng thei tak tak kan ngah hle mai a, thil inti hria pawh hi kan lo tam thin hle a ni. Hmeichhe hmeltha pawh kan lo intodelh viau maiin kan mizo nula thlalak sexy tak takte pawh hmuh tur kan lo nei nual mai bawk. Politics lam hawia inchirhthehna phei chu a tam lutuk zawk a, chhiar peih leh peih loh a ni zawk mai awm e. Heng kan intodelhna tam takte hi mimal pawhin kan hlawkpui leh kan hnemhnanpuina sawi tur erawh a awm lo viau thin a, chhungkua leh khawtlang pawhin kan hlawkpuina hriat tur a tam thin lo hle. Ram leh hnam tan phei chuan thil tangkai lo an ni mah mah zawk hial mai thei a, a hnam anga hmingchhiat phah theihna turte pawh a ni hial zawk thei awm e.
Mimal leh chhungkua mai bakah khawtlang leh ram pawhin kan hlawkpuina tur leh kan thatpuina tur thil lamah erawh kan la intodelh lem lo viau mai a, zirna lamah ngei pawh All India Services kan tih, heng IAS, IPS, IFS etc leh Central services kan tih, IDAS, IES, ILS, etc lama lut kan tlem dante, ei hmuhna tling tura Modeling lama kal kan tlem dante, zai lamah ngei pawh ei hmuhna tlak tura kal kan la tlem ziate ngaihtuah hi chuan kan hmabak hi ala ko ang reng viauin a hriat. Kan intodelh lohna lam hi kan bawh chak a ngai hle mai a, mimal leh chhungkua mai bakah kohhran leh khawtlang ngei pawh hian helam kawnga kan thalaite kan zirtir tam lehzual a pawimawh bawk ang. Chutiang a nih loha Cell phone hmanga an duh chen chen games kan khelh tir emaw an duh ang anga kan fate kan tal tir mai mai chuan kan hmabak hi a thim viau thei a ni.
Engemaw changa tuin emaw hlawhtlinna a chang tih thawmte hriattur a han awm leh zauh thinte hi hriat a nawm em em rualin tute emaw sex tape leak out thawmte kan han hre leh bawk thin hi chu a hnam ang pawhin a zahthlak a, kristianna lam atanga thlir phei chuan a pawi viau a ni. Helam hawia intodelh kan tum hi a dik lo a, helam hawia kan thalaite thinlung pek pawh hi a tha hek lo. Kum tam pawh la liam loa kan hnena inhlawh tur rawn lut thin, keini’n ‘Dumka Labour’ mai mai kan lo tih thinte chu tunah chuan hmuh tur an awm tawh meuh lo a, an vang ta pharh mai. Enge a chhan kan tih chuan an ramah inhlawhna tha an hmu a, an ramah hlawk zawka hnathawh tur a tam tihna a ni mai. Chhim lamah Chakma thalaite lah chuan ram an rawn zauh duai duai reng mai bawk a, zirna lamah pawh kan chungah an leng dawn ta hial mai, mizo thalaite hi ruia thle mai mai hman kan ni tawh lo a ni.
Zai lam emaw Fiamthu thawh lam pawh nisela ei hmuhna tlak tura kan thawh a pawimawh a, Lirthei khalh lama kan tui a nih pawhin chhungkaw chawmna tham tur law lawa lirtheih khalh i tum zawk ang u. Chutiang a nih loha a phawvuaka kan buai mai mai a, a tak ram thleng peih tak tak lo kan nih chuan he hnam hi a dingchhuak ngai lo ang a, kan chhehvela hnam dangte hian min la chim ral thuai ngei ang. Ram hmangaihna avanga Politics lama kalte ngei pawhin hmangaihna tak tak nena ram rawng an bawl a pawimawh a, chutiang niloa Politics hi sum hmuhna hmanrua mai atana an hman zawk chuan he ram hi an hruai khawlo zawk ang a, ram hruaitu tlak an ni lo tawp tihna a ni ang. Engkim hi hmangaihna nena tih ni vek zawk sela, engkim hi thinlung tak nena tih ni zel bawk rawh se. Chutiang thinlung neitu chu he ram hian vawiin atang hian a mamawh a ni. Chuvangin kan intodelh tawhna lamte hi chu duhtawk rihin kan la intodelh lohna lamte hi kan bawh chak a hun viau mai a, helama inzirtirna pawh kan uar a pawimawh ta hle mai.