Boruak a lum chho tan, engkimah fimkhur ang u
Khua a ro in, boruak a uap chho leh tan hle a, hetih lai hian ruah bawhawk a awm hun a ni chho bawk. Mitinte kangmei tichhuak thei leh ruahtui bawhawk thei laka kan fimkhur hi a ngai hle.
Khua a ro hunlai hi kangmei chhuah duh hun lai a ni a, awlsamtein kangmei a chhuak fo duh hle. Kan electric chhit leh hmante enfiah tha ila, ranvulh mite pawhin wiring kal a dik tawk em tih kan enfiah fo a tul. Chhiatna a thlenin puh tur zawn ruai a awl tawh thin a, tun atangin kangmei chhuak thei laka kan fimkhur tlan a, a tichhuak lo tura zirtirna petu nih i tum zawk bawk ang u.
Tin, fur a hnai a, to haw hun, ruah bawhawk tam hun a lo ni lehzel nen, luia kal leh kal tumte pawhin sabereka khuangkaih thleng thei reng a ni tih kan hriat a, kan fimkhur a ngai viau bawk. Harsatna a lo thlenin chiai mai lo ila, a theihna zawn apianga kan fimkhur a, kan lo inhmakhua ve thiam pawh a ngai awm e.
Kan khawsak a changkang chho ve zel a, kan nunphung pawh kan thlak chho ve hret hret zel bawk. Faina leh thianghlimna kan ngai pawimawh thar a, keimahni kan intifai peih ang bawk hian kan sulhnu tihfai kawngah tan la thar bawk ila, kan chunga harsatna thleng let thei a ni tih hrereng chunga khawsak leh chet kan thiam pawh a tul hle.
Kangmei tichhuak lo turin fimkhur ila, kangmei chhuak thleng thei nia kan hriat chu enfel thuai thuai zel bawk ila; ruah bawhawk laka chhiatna a thlen lohna turin mahni theuh i fimkhur thiam bawk ang u.