Aizawl : Sorkar laipuiin kuthnathawktu ten bank kaltlanga sum an puk theihna tura a ruahman – Kisan Credit Ca- rd (KCC) loan chungchang Lawngtlai district mipui hnena puanzar dan tur sawihovin nimin khan Lawngtlai bawrhsap Andrew H. Vanlaldika hovin a kaihhnawih mipawimawhte an thukhawm.
Lawngtlai bawrhsap chuan sorkarin mipui hamthatna tur ruahmanna tha tak tak a duan te a chhawrtu tur ten an hriatchian loh avanga chhawr manglohva liam mai mai a awm fo thu sawiin, KCC loan chu a pung hniam tea rulh theih tur, kuthnathawktute tana dinchhuahpui theih tur ruahmanna tha tak a nih thu a sawi a. Lawngtlai district mipui ten tangkai taka an chhawr theihna tura puanzar leh hrilhfiah ngei tur a nih thu a sawi bawk.
Lead bank office, Lawngtlaia Lead district manager Lallawmkima’n KCC chungchang a sawifiah a. NABARD, bank hrang hrang leh line department aiawh kalkhawm ten Lawngtlai district-a hlawhtling taka KCC kalpui a nih theih dan tur leh mipui hnena hrilhfiahna (campaign) buatsaih dan tur an sawiho.
Sorkar thuchhuahin a tarlan danin KCC loan hi chi hnih – Crop loan (ministry of agriculture & farmers’ welfare hn- uai) leh Animal husbandry, dairying and fisheries (ministry of AHDF hnuai) a awm a. Kuthnathawktu ten mahni account neihna bank kaltlanga lak theih niin, a pung engemawzat chu sorkarin a rulhsak tur a nih avangin a sum lu baka mahni rulh ngai chu tlem te a ni.