MNF president, Chief Minister Zoramthanga chuan BJP chu Kristiante tana him lo a nih avangin zui tlak an ni lo tih a sawi.
May 5, 2022-a Mara Autonomous District Council (MADC)-a inthlanpui neih tura campaign-a Siaha-a châm mek, Zorama chuan nimina Kawlchaw East, Serkawr leh Tuipang ‘V’ khuaa a campaign-naah BJP zui tlak an nih loh thu hi a sawi a ni.
Zorama chuan Mizoram state BJP president-in central-ah President Rules-a dah turin sorkar chu hek mah se central-a an hotute hian Mizoram BJP-te thu leh hla hi an la lem lo tih a sawi.
“Central BJP hotupa ni thin, tuna India vice president ni ta, Mizoramah lokalin Assembly House-ah thu a sawi a, MNF ministry chu dan leh thupek kawngah te, ram hmasawnna an thawhna kawngah te fakawm a tih thu a rawn sawi thung si a, central-a an hotute hian Mizoram BJP-te thu leh hla hi an la lem lo tih a hriat hle a ni,” a ti.
Congress party chungchang sawi tel bawkin, “Congress khawnvartui Central-ah a baw vek tawh a, hetah a phita chauh a awm tawh a, awmzia an nei thui lo,” tiin, kum 2023-a MLA inthlan lo awm turah, Congress chuan under 5 pawh an save dawn lo, an tihfuh berah pakhat bak an tling dawn lo niin a sawi.
Zorama chuan Mizoram kawngpui chu a vei thu sawiin, “A taka mit ngeia hmuh ka duh avangin helicopter-in ka kal ngai lo,” a ti.
MNF president hi Vety Minister Dr K Beichhua, Lawngtlai East Bialtu MLA H. Biakzaua, LADC sorkar hotu leh MNF party hruaituten an tawiawm a ni.