BJP Mizoram Pradesh President Vanlalhmuaka chuan, chief minister Zoramthanga kaihhruai MNF party chu mahni tuh loh rah seng tum tawh lo turin a ngen.
Nimina State Party office-a mi thar lawm luh inkhawmah thu sawiin Vanlalhmuaka hian, tun hnaiah BJP zawm thar an pun nasat thu sawiin, “Kum 2023 MLA inthlanpuiah Mizoramah pawh BJP sorkar a ding ngei tawh dawn a ni,” a ti.
Vanlalhmuaka hian Mizorama sorkarna chelhmektu MNF party chuan an party zawm tura mite thlem na’n ‘BPL-ah kan thun ang che u’ tih te, ‘PM Kisan-ah kan telh ang che u’ tih te, ‘In sak tanpuina kan pe ang che u’ tihte an ching thin tih sawiin, “BJP sorkarin Central scheme hrang hrang mipui, mirethei te hamthat nana a duan hrang hrangte chu sorkar lai chuan an mahni party hamthatna zawnna atan an lo hmang thin a, a zahthlak hle,” tiin, mahni tuh loh rah seng tum tawh lo turin sorkar lai chief minister Zoramthanga kaihhruai MNF Party chu a ngen duh tih a sawi bawk.
BJP Mizoram Pradesh President hian, khawvel ram ropui zinga chhiar tel thamin India ram chuan nasa takin hma a sawn mek a, Mizoram state pawhin ram pum hmasawnna kal mekah vanneihna tam tak a dawng mek tih sawiin, “India ram mipuite hian hmasawnna a taka an hmuh avangin kum 40/50 tal hi chu central-a rorelna hi BJP kutah an pe ngei dawn tih a chiang a ni,” a ti.