Mapuia Memorial Mizoram Cricket League 2022-ah Luangmual Cricket Club leh Ramhlun Venglai Cricket Club ten Thawhlehni khan an khingpuite hneh ve ve in table chunglam an pan.
Luangmual in MCL hnuhnung bera champion Kulikawn Cricket Club chu wicket 4 in an hneh a. MCL table-ah pathumnaah an inhlangkai. RVL in a zawna vawi thum an chakna turin Bawngkawn South CC an hneh ve thung a, khelh nga atang point 8 hmu in pahnihna an hauh mek.
Inkhel hmasa zawkah Luangmual in vawm an thlang a, an bowler rinrawl G. Lalbiakvela chuan wicket thum la in midang panga in wicket khat theuh an la a, Kulikawn in run 104 over 20 chhungin an siam a, Saroj Kumar (25) leh Nasib Rai (23) te bakin run sawm aia tam an siam tling lo.
Luangmual tan bat hmangin Lalrempuia a che a, run 47 siamin G. Lalbiakvela’n 25 a thawh bawk a, over 19.5-ah wicket 6 hlohin run 108 an siam a, hnehna an chang.
Inkhel hnuhnung zawkah Ramhlun Venglai in wicket nga in hnehna an chang a. Vuak thlang zawk Bawngkawn South chu over 18.2-ah an vawm out zova, Bawngkawn South hian run 102 an siam a, run 23 siam Michael Lalhmachhuana chuan an team tan run a siam hnem ber.
Ramhlun Venglai tan wicket hnih la pahnih zinga tel Johan Lalbiakkima chuan run 24 a siam a, RVL batsman-te zingah rei tak ding awm lem lo mahse run an siam nual hman zel avangin over 19.4-ah harsatna em em nei lovin run 103 an siam a, hnehna an chang.
Bawngkawn South tan Moses Ramhlunmawia chaun over 4 vawmin wicket hnih a la a, midang pahnihin wicket khat ve ve an la.
Nilaini hian an inkhelh apianga la chak vek Chanmarians CC in Chhinga Veng CC an hmachhawn leh anga. Chawhnu dar 1-ah Kulikawn leh Ramhlun Venglai te an inkhel ve leh ang.