Union home ministry chuan Thawhlehni khan Unlawful Activities (Prevention) Act, 1967 hmangin Lashkar-e-Taiba (LeT) commander Sheikh Sajad-a chu mi firfiakah a puang.
Sajad-a hi firfiak taka a chet thin bakah Kashmir Valley velah thalaite chu India do tura hmina firfiak pawl zawm tura thlem thin a ni.
“Sajad-a hian Jammu & Kashmir-a thalaite rilru hruai kawiin Lashkar-e-Taiba zawm turin a hmin thin a, firfiaka chetna puihna lamah pawh a tel nasa a. Jammu & Kashmir-a ralthuam tawlh luhnaah pawh a inhnamhnawih,” tiin ministry of home affairs (MHA) chuan thuchhuah a siam tinh news agency ANI chuan a tar lang.
MHA chuan Sajad-a hi pawikhawihnaa a phiartu pawh a nih thu sawiin, June 14, 2018-a Srinagar khawpuia chanchinbumi hriat hlawh tak leh a vengtu pahnihte thahna pawh ama ngaihtuah chhuaha chetna niin an sawi.
Chanchinbumi thah hming hi MHA chuan a sawi lo va; mahse, inthahna a thlen ni hian Rising Kashmir editor-in-chief Shujaat Bukhari chu Srinagar-a Press Enclave, Lal Chowk-a a pisa a chhuahsan hnu lawkah kah hlum a ni.