Aizawl: AH&Vety department phalna nei lo tan Aizawl district chhungah vawk leh vawksa atanga siam lak luh khap a ni.
Aizawl Bawrhsap Dr Lalhriatzuali Ralte hoa District Level Co-Ordination Committee on African Swine Fever (ASF) nimina thukhawm chuan ASF leng thar leh chungchangah Aizawl district chhunga hmalak dan tur an sawi ho a. Ram pawn atang leh district dang atangin AH&Vety department atanga phalna neite chauh lo chuan vawk leh vawksa atanga siam reng reng lak luh khap an rel a ni.
Aizawl district-a Prohibition Order awm mek chu department-a thawk leh police, Assam Rifles leh BSF te nena thawk hoa khauh taka kalpui tur leh, khapna thupek bawhchhiate chu an chungah na taka hremna lek kawh a nih theih nan a tul anga FIR thehluh zel nise an ti.
Thutkhawmah hian hmun dang atanga vawk la lut turten an lakna tur hmun atangin ASF Free certificate neih ngei a tul thu te, vawk thi reng reng paih mai loin thuk taka phum zel tur a nih bakah vawk hrisel leh thianghlim, veterinary daktawrten talh tlak nia an ngaihte chauh talh tura tih a ni.
ASF Awareness Campaign hi khaw tin leh veng tina local council/village council kaltlanga a tam thei ang ber kalpui nise tiin an rel bawk.
Tun dinhmunah ASF hi hmar tlangdung khaw thenkhat – Sakawrdai-ah 286 thi tawhin, vawk pathum suat a ni tawh a. New Vervek-ah vawk pakua thi tawhin, vawk panga suat a ni tawh a. Darlawnah pawh vawk 215 thi an awm tawh a, vawk 108 suat tawhin, a vaia belhkhawmin vawk 510 thi tawhin, vawk 116 suat tawh a ni.