BJP National Secy in MNF sorkar puhchhia

Aizawl : BJP National Secretary Kisan Morcha, Mizoram incharge ni bawk KH Jibon Singh chuan MNF sorkar chu PM Scheme hrang hranga lo neitute hamthatna tur mipui hnena puangzar duh lo leh zirtirna pe duh lohah a puh.
BJP Mizoram Pradesh chuan nimin khan lo neitute tana hamthatna inhrilhhriatna hun an party conference hall-ah an hmang. He huna khuallian KH Jibon Singh chuan Mizorama a lokal chhan sawiin, loneitute tana incharge a nih thu leh PM Scheme hnuaia lo neitute hamthatna tur 186 awmte Mizoram mipuite hnena hrilhhriat hi a nih thu a sawi.
KH Jibon Singh chuan MNF sorkar hian PM Scheme hrang hranga loneitute hamthatna tur 186 lai mai chu mipui hnenah puangzar duh loin, zirtirna pawh an nei duh lo chu pawi a tih thu a sawi a. “Mizoram a lo nei a eizawng mi rethei te leh harsa zawk te’n he’ng Scheme kal tlanga hamthatna an neihna tur hrang hrang kan hriatloh phah a, hamthatna kan dawn tur kan dawn loh phah hi a pawi hle a, he mi a mawhphurtu chu state-a sorkar lai MNF hi a ni,” a ti.
National Minority Secretary Elizabeth Nongbri pawhin thu sawiin, BJP chu mi tam takin Hindu party ang hial a an sawi leh, Kristian te tana tha lo anga an sawi fo chu thudiklo a ni tih a sawi a. “Mizoram a Kohhran hruaitu thenkhat te nen a inkawmna kan neih naah pawh BJP nihna diktak ka sawi pui a ni,” tiin, BJP chu sakhaw tihbik nei lo party a nih avangin hmasawnna pawh rualkhai takin India ram chhung hmun hrang hrangah kalpui mek a nih thu a sawi.
Thusawitu dang BJP State President Vanlalhmuaka chuan, “Chief Minister Pu Zoramthanga’n BJP an zawm theih loh thu a sawi chu, mahni mawnghlim mai a nih zia tilangtu a ni. Nikum November thla lawkah BJP/NDA/NEDA member rinawm tak anih thu ziak meuhvin Union Home Minister Pu Amit Shah hnenah a thawn a, ani ang hi India ram Chief Minister ah tumah an awm lo,” a ti.
Vanlalhmuaka chuan, India rama mipui ei tur minpe tu te hi lo neitute an nih avangin PM Modi pawhin a ngaihthah theih loh thu a lo sawi tawh tih a sawi a. “Keini Mizoramah erawh lo neitute, kuthnathawktu te ngaihthah leh rahbeh anni thung a, vawiina lo neitu te leh kuthnathawk tute hamthatna tur hrang hrang hi keini BJP chuan tih hlawhtlinsak hi kan tum ber a ni,” a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427