Aizawl : National Trade Union of Mizoram (NTUM) chuan thuchhuah siamin, Champhai leh Aizawl inkar a tlan tur Mizoram State Transport Bus (Deluxe), Transport Minister zahawm tak Pu T.J. Lalnuntluanga’n ruahmanna a siam kha lawmawm kan tih em em laiin Service pawh neih tak tak a nih hma a tih tawp a ni leh ta mai chu pawi kan ti em em a ni, an ti.
NTUM chuan, MST Bus hi Champhai leh Aizawl inkar ah tlan reng thei tawh se kan duh em em a, Champhai leh Aizawl inkar zin veivahna atana mipui ten duhthlan tur nei lova Sumo chauh rin a nih hi kawng thenkhatah mirethei zawkte tan phurrit a tling thei niah NTUM chuan kan ngai a ni, an ti a. Thenkhat tan Sumo fare hi engthammah ni lo mahse mirethei tam zawk tan hian phurrit a tling theih tih NTUM chuan a hria a, chuvangin man man zawk a chuan theihna awm leh duhthlan tur awm hi mipui tan thil pawimawh tak a ni tih hi NTUM ngaihdan a ni, an ti bawk.
NTUM chuan MST Bus service tir leh chawlh tir lehnghal a nih chungchangah ziakin transport minister hnenah service tir chhunzawm tura ngenna an thlen thu an sawi a, tihhlawhtlin a nih ngei an beisei thu an sawi bawk. An hmalakna chungchangah hian Champhai mipuite pawhin thlawp turin an ngen bawk a ni.