Coppa Italia final-ah Inter Milan khel dawn

Tun season-ah a vawi li nan Derby della Madonnina khelh a ni a. Thawhlehni zanah Inter Milan in Coppa Italia semi-final second leg-ah AC Milan chu 3-0 a hnehin final an lut.
San Siro a second leg-ah hian dinhmun inang atangin team inhal pahnihte an inkhel a, first leg-ah goal an inpe thei lo.
Second leg-ah erawh Italy champion lai Inter in minute 4 bak goal khung nan an mamawh lo. Internazionale striker Lautaro Martinez chuan Matteo Darmian-a ball cross chu fing takin goal-ah a khung a, Edin Dzeko aia bul tan tir a nih chu a coach ten an ti fuh.
Milan in an chhanglet thuai teuh a, Rafael Leao goal khung tur Samir Handanovic chuan a dansak a, Slovenian goalkeeper hian Alexis Saelemaekers goal khung tur pawh a dang.
An hun tha neih an hman tangkai theih loh Milan in an tuar a, halftime dawnah Martinez bawk inlar lehin a hnampui Joaquin Correa ball siamsak chu goal-ah a khung nawn.
Second half-ah pawh Milan in goal hlauhawm an nei zeuh zeuh a, mahse an tluan tling lo thin. Ismael Bennacer goal khung pawm a ni lo bawk a. Mahse minute 82-naah inkhel dahthat a ni a. Inter substitute Robin Gosens chuan an goal thumna a khung a. Inter in kum 2011 hnua a vawikhatna atan Coppa Italia chawi tumin final an lut.
Inter striker Martinez chuan, “Final khelh tur kan nei leh a, hei hian min ti lawm. Tun season-ah ka chetthat tawk loh avangin sawiselna te awm mahse he kawr ka hak hian theihtawp ka chhuah thin a. Club in ka chungah rinna lian tak an nghat a, hei hi ka rulh let a pawimawh.” tiin a sawi.
Milan boss Stefano Pioli chuan, “Chak kan duh a, mahse kan hlawhtling lo. Team tha tak hmaah kan ding tih phat theih a ni lo.”
“Kan inkhel erawh a pumpui a thlirin 3-0 hi a na a, Inter khan a hun takah zel goal an khung a, 2-1 nih tir thei ila chuan engkim a danglam a, kan thawhrim loh vang a ni lo.” a ti ve bawk.
Final-ah hian nizana Juventus leh Fiorentina inkhela chak zawk an hmuak.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427