India khawpui, Delhi-a tun hnai lawka sakhaw thil avanga intihbuaina a chhuah chiamna vengah thuneitute chuan Nilaini khan bulldozer hmangin in eng emaw zat an nawr chhia a, Supreme Court thupek angin an hna erawh a hnuah an chawlhsan thung.
Jahangirpuri venga kawng sira dawr eng emaw zat chu Nilaini tuk khan bulldozer-a nawr chhiat a ni a, dawr neitute chuan an in atangin an dawr chhia leh hnawkte truck-in a thiar sawn lai chu an thlir liam ringawt.
Parliament atanga km 25 vel chauhva hlaa dawr nawr chhiat lai hi police leh venhim hna thawktu dang tam tak an awm a. Eng emaw chen an nawr chhiat hnuah Supreme Court chuan he hmalakna hi a titawp rih a ni.
Chief Justice NV Ramana-a kaihhruai judge pathum awmna bench chuan hemi chungchang ngaihtuah a nih hma chu kutthlak tawh lo turin thupek a siam a, Ningani hian a ngaihtuah chhunzawm leh dawn a ni.
Court-a petition thehluttu chuan khawpui thuneitu (municipal) chuan hetianga an chet hma hian dawr neitute hnenah an hriattir lawk hmasa lo niin a sawi.
Court sang berin thupek a chhuah hnuah pawh hian darkar khat dawn chu hna hi thawh chhunzawm a ni a, he venga mosque luhna pawn zawk leh a luhna step thlengin an nawr chhe hman.
Bulldozer-te hi Hindu temple luhna tur bulah an ding a, hei hi mosque atanga metre 50 awrh chauhva hla a ni a. An chet dan chu he lai vela Muslim chengten nasa takin an sawisel a, an sakhaw zui vangin an tum bik niin an sawi.
A pian hlim atanga helai hmuna cheng, kum 31 mi, Sabiran Bibi chuan, “He ramah hian Muslim-te kan chen ve hi an duh lo. Engvang nge? Muslim-te hi mi firfiak kan ni em ni?” tiin thinrim takin a sawi.
Thuneitute erawh chuan hetianga dawr leh in an nawr chhiatte hi dan bawhchhiaa in dingte an nih thu leh tute emaw tih bikna a ni lo tih an sawi ve thung.
Hetih lai hian sawiseltute chuan India rama mihring tluklehdingawn 1.4 cheng zinga 14% chauh ni phak, Muslim-te laka hleilenna leh tihchimih tumna niin an ngai a. Prime Minister Narendra Modi-a telna, Hindu behchhan BJP-in ro an rel hnuah hetiang hi a tam zual niin an sawi bawk.
BJP mi, North Delhi Municipal Corporation Mayor Raja Iqbal Singh chuan thuneitute chuan dan lova in din, kawng nek lutukte chu tihchhiat vek an tum tih a sawi.
Nilainia an chetna leh helai venga a hma lawka Hindu leh Muslim intihbuaina chuan inzawmna a nei loh thu a sawi a; mahse, dawr neitu tam tak chuan inzawmah an ngai tho thung.
Delhi BJP chief Adesh Gupta chuan a hma lawkin municipal thuneitute chu dan lova in dinte thiat turin a lo ti tawh a. A hnu lawkah chetna a thleng zui a, hei pawh hi thuneitute chuan inzawmna a nei lo va, ‘tih dan thin pangngaia che chhuak’ mai an nih thu an sawi bawk.
Muslim-Hindu buaina zuitu?
Delhi-a Jehangipuri venga Nilainia thil thleng hi thuneitute chuan tute nawrna avanga ti mah an nih loh thu sawi mah se mi tam tak chuan BJP hruaitu pakhatin a nawr vang bakah ni li liam ta leka Muslim leh Hindu intihbuaina chhuah hnu lawka chetna a nih avangin inzawmna a neih an ring hle a, zawhna leh sawi leh sel a tam phah.
India ram hmun dangah tun hnaiah Muslim leh Hindu sakhaw zuitute inkara buaina a chhuah hnu lawka Delhi-a thuneitute chet zuina ang hi a thlen fo tawh avangin rinhlelh a hlawh phah.
Kar hmasa khan Madhya Pradesh state lailia Khargone khawpuiah pawh April 10 khan Hindu-ten Lord Ram-a piancham an lawmnaah buaina a chhuak a. Hindu-te hi ngunhnam leh tiang kenga kawng zawhin Muslim chenna veng leh mosque an kal pel.
Hetih lai hian sakhaw pahnih zuitute hi intihbuaiin lungin nasa takin an intawng niin police chuan an sawi.
A tuk chiahah bulldozer-in Khargone-a veng pangaah build 50 chuang nawr chhiat zui niin thenkhat chu in leh dawr a ni a. A vaiin ni lo mah se a tam zawk chu Muslim-te in hmun lo ram niin tual chhung chanchinbute chuan an tar lang.
Khargone District Collector P Anugraha erawh chuan, “Building tihchhiat takte hi dan lova sak an ni a, sakhaw pahniha mite, mipui ram nektute in a ni,” a ti ve thung.
Tun thlaah vek hian Madhya Pradesh leh Gujarat-ah pawh Hindu sakhaw kût hmannaa intihbuaina a chhuah hnu lawka in eng emaw zat lo nawr tluk a ni tawh bawk.
Heng state pahnihte hi BJP rorelna ve ve a ni.
Thawhtanni khan Muslim pawl hlun tak, Jamiat Ulama-e-Hind chuan the Supreme Court-ah petition an thehlut hial a. “Bulldozer hmangin politics hlauhawm tak khelin hei hian sakhua leh hnam tlem zawk, a bikin Muslim-te tum thin niin BJP rorelna state-ah hetiang laka hian venna pek ni se,” an ti a ni.
MP hlui, dan hre mi ni bawk, Majeed Memon-a chuan, “Hetianga chetna hi chu mipuiin mi an pawngchil nen a inang reng a ni,” a ti bawk.