Premier League table chung ber luah turin Liverpool an chhova, football club inthlau tak pahnih inkhelah Manchester United chu kawng engkimah khumin 4-0 in Thawhlehni zanah an sawp.
Anfield a inkhelah Manchester United an mualpho chiang hle a. England a club lian ber tia inchhal hian midangte an phak lohzia chiang takin a lang. An khingpui Liverpool in champion an tum hle a, hmahruaitu ni thin Manchester City chu thawkna hun an pe dawn miah lo tih an lantir a. Tun season-ah inelna pali ah an la champion thei mek.
An inthlau
Manager nghet thar nei thuai tur United-ah an hotupa thar tur Erik ten Hag-a tan hnathawh tur a tam hle tih chiang takin a lang a. United tana minute 93 an inkhelh chhunga a eng lam thlir tur awmchhun chu inkhel minute 7-na a Liverpool tantute zawng zawngin a fa piang hlim thihna avanga Cristiano Ronaldo leh a chhungte tana minute khat chhung kut an ben chu a ni a. A bak chu Liverpool lawmna vek a ni.
Minute 5-naah Reds in goal an khung nghal a, awlsam taka United tlarhnung thiatin Luis Diaz chuan goal a khung a. Minute 22-naah football mawi an khelh atanga Sadio Mane ball duhawm tak a hmuh chu Mohamed Salah in goal ah a khung.
Second half tir lamah United in thochhuah leh tumin insiamthat an hnaih hman a, mahse Sadio Mane-a’n inkhel dahtha in goal thumna a khung a. Minute nga a la awmin Salah-a’n a goal hnihna a khung.
Reds hian point hnihin hma an hruai a, nizana Brighton hmachhawn tur City in an pel lehnghal thei thung.
“A zahthlak”
Manchester United interim manager Ralf Rangnick chuan an result a sawisel a. Insiamthat nasat hle an ngai tih a sawi.
“A zahthlak a, a hreawm a, a mualphothlak. First half-ah phei kha chuan tihngaihna kan hre lova, kan pha ve ngang lo a ni ber.”
“Tlarhnungah khan mi pasarih pawh dah ila, ball inchuhahte, second ball lakahte engmah tih tumna tak tak kan neih ve loh chuan awmzia a awm lo.”
“He inkhelah hian Liverpool thatzia a lang a, keini lamin kan pha ve lo. Keini leh anni inkarah hian kum ruk vela hmasawnna a inthlauhna a awm.” a ti.