- Mahmuaka Chhakchhuak
Khawvela kan chen chhung hian lungawihna famkim hi neih a har thin ngawt mai a, sakhaw rawngbawltute tan ngei pawh thinrimna tur tam tak a awm fo thin bawk a. Anni erawh chuan insumtheihna an neih bik avangin thinrimna an neih chu an ti lang lo mai chauh zawk ni te hian a hriat a. Mipui nawlpui te hi chuan harsa kan tiin kan insum thei lo hi kan puak leh phawng phawng mai thin a, amaherawhchu chutiang chu thil tha ber alo ni lem chuang hauh lo mai. Phuba lakte hi a chakawm a, thinrimna pai ral mai thei lo mi tan ngat phei chuan khaw eng hmu lo leka thinurna lan chhuah tir mai te hi thil chakawm tak a ni ngei ang.
Pathianthu lamah erawh chuan ‘Duhtakte u, in phuba la suh ula, Pathian thinurna kian zawk rawh u, Phuba reng reng keima lak tur a ni, keiman ka thungrul ang, Lalpain a ti’ (Rom. 12;19) tih thu kan hmu a, sakhawmi tan chauh ni loin tu tan pawh hian he thu hi thu pawimawh tak a ni. Phuba lak avanga hahdamna nei ta tura inngaihna hi thil dik lo tak a nih piah lamah he leilungah hian hlimna thlentu a ni hauh lo mai a, ngaihdamna thinlung neitu zawk tan he leilung hian hahdamna min lo thleng zawk daih a lo ni. Chu chu chunglam malsawm duh zawng tak alo ni bawkin a hnu zelah pawh alo lawmawm zia kan hre zel zawk bawk si a.
Khawvelah hian mitin mai hian hlimna dik leh famkim nei tur hian mamawh kan nei tam lem lo hle mai. Sum leh pai hmanga neih theih hauh loh thil pathum – Good Food, Good Sleep leh Good Sex te hi mi nazawngin an neih mai theih loh a nih laiin mi te ber pawhin an neih theih a ni bawk a. Sum leh pai hmanga neih tum ngawt theih a ni lo a, lo tum awm tehreng pawh nisela a famkim chuan an nei thei tak tak chuang lo ang. Taksa mai piah lamah ngaihtuahna hrisel nei te chanvo atan chauha chunglam ruat bik a ni. Khawvel mi hausa ber pawhin heng thil pathum hi a mamawh a nih rualin a nei ngawt thei bik lo a, chutih rualin mi rethei ber pawhin a neih maitheih tura chunglamin tu tan pawh a dah a ni bawk avangin heng thil pathumte hi vawiin tlengin mi tam takin an la zawng a, an zawn dan kawng erawh a in ang vek lem loh avangin buaina satliah mai pawh nilo thihna hial a thlen phah fo thin bawk a nih hi.
Good Food tih chu eitur tha tihna a ni loin ei leh in tih that lam zawk sawina a ni. Sa leh hmuihmer hlir ei hi Good Food a ni lo a, Antam tlak hang leh hmarcha rawt thak ringawt nen pawha tuk zana puar tha taka ei theihna lam sawina a ni. Good Sleep pawh hi Saingho hmanga siam khum nuam taka mut lam ni loin mau chih pharh chungah mai mai pawh tui taka zan mut theihna lam a sawina a ni a. Chutiang bawkin Good Sex pawh khawpui tam takahte chuan Nawhchizuar an awmin duh hun hunah sum hmanga dawr maitheih an ni a, chutianga duh hun huna sex hmanpui a, va inhrikthlak theihna lam ni loin thinlung leh rilru hlim tak leh lawm taka hmeichhiat mipat hmanna lam zawk a ni. Heng thil pathumte hi sawi tawh angin chuti maiin a neih ngawt theih loh a, hmuntina hmuh theih mai a nih rualin a zawngtu apiangin an hmu vek lem chuang hauh lo a. Ngaihtuahna hrisel tak nei leh thinlung hrisel tak neite tan chauha chunglamin a ruat zawk a ni.
Heng thil pathum hi kan mamawh engkim hlawm khawmna a nih tlat vangin a pawimawh em em a, heng pathuma tuihal tak takte phei hi chuan tumah zah an nei tak tak thei ngai lo a, mitmei venna hun an nei ngai hek lo. A pathuma nei kimte phei chu mi awhawm tak an niin lawmna kim nei ang maiin an hlimin an nun a hahdam em em a, an thiltihna leh hnathawhna hmunah ngei pawh phur takin an tih theih phah zawkin, chu chuan hlawhtlinna kailawnah a hruai thleng thin a ni. Chuvangin lungawihna famkim nei turin thil tam vak kan lo mamawh lo tih a hriat a, kan mamawh leh duh chu heng thil pathum te mai chauh hi alo ni. Khawvel mi rorum ber pawh hi ral leh hmelmate kiangah chuan thisen chhuah chakin tuihal hle thin mahsela, hmeichhe no tak kiangah chuan awlsam takin an lo in bengdai leh thei mai zel a, hei hi a chhan chu engdang vang ni loin sex-ah lawmna nei thei dawna an inhriat thin vang a ni a. Chutiang bawkin riltam chungin tumah hian hna kan thawk tak tak thei chuang loin thinlung a hlim tak tak thei chuang hauh lo a, chung pahnihte chu lo nei ta pawh ni ila zan lama tui taka an mut ngai loh chuan an nun a hahdam thei hauh chuang lo ang.
A mal theuha zawng an tam a, kan kiang velah ngei pawh hian In ropui leh nuam tak tak chhunga chengte hahdamna hmu lo leh zan mut dawna damdawi ei ngai ziah khawpa mu tha thei ngai lo te hi sawi tur in hriat ve ngei a rinawm. Chung mite chuan sum leh pai chu an nei nameuh mai tak nain an mamawh ber chu tui taka mut theihna chu a ni si a. A thente chuan zan muttuina atan tiin Zu an in phah bawk a, damdawite an ei phah thin. Chutiang bawkin hlim taka hmeichhiat mipatna hman dawn pawhin nupa tam takte chuan damdawite an hman phah bawk a nih hi. Damdawi chuan a thawh hun bituk a nei a, reilote chhung a nih bawk avangin damdawi an ei fo alo ngaih phah a, damdawiah chuan an nun alo innghah phah thin hial a. Nimahsela chutiang chuan hlimna tak tak a thlen zo chuang lo a, sex-a hlimna zawng tam takte phei chuan an beidawn phah thinin an nun alo khawloh phah zawk ta thin a, a pawi thin hle. Sex thiltihtheihna hi hneh theih rual loh khawpa chak a ni thei a, a bawiha tang tawhte tan tlanchhuah leh mai mai theih loh tura min man nghet thei tu a ni thei hial. Chuvangin hlimna dik leh tlo zawk ilo neih theihna atan thinlung hahdam tak leh ngaihtuahna fim tak nei hmasa thin ang che. Chumi baka thildang chu kan thawhrimna atanga neih theih vek a ni ti ila a sual kher awm lo e.