KHA CHANCHIN KHA MIN HRILH RAWH

  • Lalhruaitluanga Chawngte

Nu pakhat, hun engemaw chen natna khuma mu tawh, chau, chawrhche leh chak lo tak mai, natna na tak avanga rimtawng ngawih ngawih kha.
Hun engemaw chen a dam lo tawh a, a na ngang mai lehnghal. Vanneihthlak takin hma a sawn ta hret hret a, chutiang dinhmuna a din lai, a insan mar theih hnu chuan “Kha chanchin kha min hrilh rawh” (Tell me the old, old story) tiin a au ta kha a ni a.
Heta “kha chanchin” a tih, “old story” a tih hi Isua leh a ropuina, Isua leh a hmangaihna chanchin a ni.
Chu mi nen chuan kan inan hmel riau hian ka hria a, amah ka la hmuh ngai loh, a piang ve a ni tih pawh a thih hnu fe-a ka hriat chauh ni mah se, keimah ang bawk hi nih hmel riau hian ka hre thin: “Kha chanchin kha min hrilh rawh,” a tih chhan atang te, chu chanchin an hrilh dan tura a duh dan atangte hian.
Naupang tê hnena thil sawi anga “kha chanchin kha” hrilh turin a ngen a, a chak loh em avang te, a rimtawng avang te, puih a ngaih em avang te, a bawlhhlawh avangtein. Chutiang mi tan chuan naupang hnena thil kan sawi anga hriatthiam awlsam tak tura sawi melh melh a ngai ang. Kan va inang tak!
Chu chanchin chu muangchanga hrilh a duh a, a lem zawh tur tawk vela hrilh turin a ngen; hrilh bawrh bawrh te, hrilh buan buan te a duh lo a ni ang. Hrilh nawn thin tur pawhin a ngen, a theihnghilh leh mai thin avangin! Ka nihna chiah a ni.
A chang tawpah “Kha chanchin mawlh kha min hrilh rawh,” a la ti lawm lawm a, he khawvel ropuina hi lem hle mah se, chu chuan a tihbuai thin avangin, kha chanchin ngai bawk kha hrilh turin a ngen a ni (Tell me the same old story).
Nem dam diaia hrilh a duh a, aw nem, mahse thahnemngai leh tih tak zeta hrilh a duh. Chutah chuan ngen a nei: Misual, chhandam tura Isua rawn kal chhan kha ka ni tih hre reng la tiin, chumi hre chunga hrilh tur chuan a ngen. Chu chu ka duh dan chiah chiah a ni. Misual, Lal Isuan chhandam a tum, khawvela a rawn kal chhan kha ka ni tih ka hriatchhuah chang hi chuan ka thla chau a hahdam a, ka thla a muang thin; tin, ka hlim thin. Mahse chutiang ka lo ngaihtuah ta lo thin a, khaw dang hawisanin thil dang ka tihsan fo. Chuvanga “ka hriatchhuah chang” ti pawh ka ni a, chuvanga hrilh nawn fo ngai pawh ka ni – a phuahtu ang bawkin – kan inan hmel ka tih tawh kha – chuvanga “Kha chanchin kha min hrilh rawh,” ti lawm lawm tur hi ka ni reng a ni.
“Tell me the story softly,
With earnest tones and grave;
Remember I’m the sinner
Whom Jesus came to save.”

(A phuahtu hi Katherin Hankey (1834-1911) a ni a, natna khuma mu chunga a poem phuah hi musician hmingthang George Washington Doane-a’n a lo hriatin, mi dang ang bawkin a duhthlu ta ngang a, a thluk a siam ta a ni. Chumi hnu chuan hymn lar a lo ni ta. Duhlian tawnga kan neih, Pu Buanga leh Sapupa te siam, ‘Thawnthu hlui chu min hrilh rawh’ tih hi chu lehlin paha tihdanglam a nih hmel.)

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427