Japan hmar lama Hokkaido thliarkar bulah khualzin phur lawngleng chin hriat lohva awmin a chuang mi 10 chu an thi tih finfiah a ni tawh tih Japan Coast Guard chuan an sawi.
Kazu 1 an tih lawnga thite baka chuang ve dang 16 chu tui vawt tak karah ngawrh taka zawn chhunzawm mek zel an la ni bawk.
Lawng hi an ram sanaa Inrinni chhun dar 1:15 (India sanaa zing dar 9:45) velah biakpawh theih loh tan a ni.
Kazu 1 hi Shiretoko Peninsula leh a chhehvela khawthlir tura khualzin phura chhuak nia hriat a ni a, darkar thum vel thang tura ngaih an ni.
Heng lai hmun hi UNESCO world heritage site niin khualzinte hian lawngin a hmunhma hi an fang uar thin hle a. A kam lung khawkrawk tak tak bakah tuipuiah whale leh sea lion te, brown bear-te hmuh tur a awm thin.
An chin hriat loh a nih hma lawk hian lawnga thawkte chuan an lawng chu pil hnaiin 30° velin a awn tawh tih hmunpui lam an hriattir niin Japanese chanchinbute chuan an tar lang.
Patrol boat leh sipai leh police thlawhnain zawn zui nghal an ni a, sangha mantute pawhin an lengin an zawnpui bawk.
Lawngah hian thawktu pahnih leh naupang pahnih nen an vaiin mi 26 an chuang.
A tirah chuan mi eng emaw zat tui atang hian lak chhuak anga sawi a ni a; mahse, heng mite hi thiin nge damin an lak chhuah hriat a ni lo.
An bona lai velah hian tui fan a sang hle a, zing lamah khan sangha mantute pawhin tui a fawn nasat avang hian hlawhchhamin khawmual lam an lo pan leh hlawm a ni.
Thawktute hian a chuangte hian life jacket an ha vek niin an sawi a; mahse, tui hi a vawh em avangin hmuh an nih thuai loh chuan damkhaw chhuahna atan a huphurhawm hle niin an sawi bawk.