Aizawl: Mizoram Presbyterian Kohhran hnuaia Pastor Bial hrang hrang Bial Inkhawmpui chu nizan khan a tiak.
Bial Inkhawmpui hi kar kalta Zirtawpni atang khan neih tan a ni a, Inrinni nilengin rorel inkhawm neih a ni. Pathianni chawhma leh zanahte vantlang Pathian Biak inkhawm neih a ni a, chawhnu inkhawmah Lalpa Zanriah Sakramen theh a ni a, zan inkhawmah bial chairman kalchhuakin Valedictory Sermon a sawi.
Inkhawmpui hman dan tur leh programme kimchang hi Bial Nomination Committee-in an ngaihtuah thin a. Bial Inkhawmpui hi rualkhai taka hman a nih theih nan a hun tur hi Synod-in ruahmanna siamin April thla Pathianni vawi lina hmanga neih thin a ni a, chutihrualin eng emaw rokhawlhna avanga hmang hma hret leh hmang tlai hret an awm bawk.
Hriat theih chinah kuminah hian bial tam zawkin inkhawmpui hi an nei thei a, Inrinnia rorel inkhawmah Presbytery inkhawmpuia chhawp chhuah tur sorkar kaihhnawih leh thil dangte rel a ni.
Presbyterian Kohhran inchhiarna hnuhnung berah kohhran mipui 6,26,958 an awm a, dan zawhkim 4,48,318 awmin chhungkaw 1,38,041 an awm a, Kohhran 1,158, pastor bial 321 a awm a ni.