Thawhhona thuthlung a fumfe tawk lo niin a lang!?
Serchhip Sub-Hqrs YMA chuan PWD nena thawhhona titawp tura hmalak an rel a, kawng tam taka harsatna an tawh thin thute pawh an sawichhuak bawk. Hei hian kawng tam takah thawhhona felfai tawk lo a la awm tih a tichiang a, PWD lam pawh hi an inenlet leh fe a ngaiin a rinawm.
YMA General Conference neih loh kuma an neih thin Rorel Inkhawm chu Serchhip Sub-Hqrs. YMA chuan kartir khan Serchhip Auditorium-ah an nei a. Kumin April thla tura Khawlailung-a Tuichangral South Group YMA-in YMA leh Mizoram PWD in MoU an ziah tihtawp an duh thu an lo rel tawh, Sub Hqrs YMA Serchhip-a Rorel inkhawma ngaihtuah tura an chhawpchhuah chu sawi ho a nih hnuah YMA leh PWD thawhhona thuthlung tihtawp a nih theih nana hmalak an rel a ni.
An sawihonaah hian an sawi nasa viau ni pawhin a lang a, hnathawh thenkhatah thu thlunna (agreement) pawh an hmuh ve theih thin loh thu te, hnathawh vil kawngah PWD zawkin harsatna an siam zawk thin nia an hriat thu leh joint inspection neih an rawt thinte pawh tihhlawhtlin a nih ngai loh thu te sawi lan a nite hi ngaihtuah chhunzawm tham tak a ni.
Sorkar hian a hnathawkte hi ngaihtuahah nei deuh se la, a tul a nih chuan na zawk pawhin hau ngam rawh se. Tlawmngai pawl lamte hian thudik lo an sawiin a rinawm loh a, PWD lam pawh hi ngunthluk zawka an inngaihtuah that leh a ngai hlein a rinawm bawk.