England hmahruaitu in Spain hmahruaitu hneh mahse an dahtha thei lo

Manchester City in UEFA Champions League semi-final second leg-ah chan tha zawk ni chungin Santiago Bernabeu an lut dawn a. Nimahsela an khingpuite nena an inthlauhna hi chhuan tham a ni dawn lova, Thawhlehni zanah 4-3 in Etihad Stadium-ah an chak hram.

City an tal na, a tawp thleng erawh an tlin lo
Manchester City khelmualah Pep Guardiola pawlte hian Real Madrid hi hun rei zawk chhung chu an tibuai fova. A bikin first half ah Los Blancos tlarhnung an phar buai hle.
Kevin de Bruyne chuan Man City tan bul tanin Riyad Mahrez-a cross chu minute hnihnaah a tauh lut a. Tunhnaia che tha Gabriel Jesus chuan chhunzawm nghal thuaiin an goal hnihna minute 11-naah a khung. Man City hi na tak takin goal an bawh a, Real an buai thin.
Mahse Carlo Ancelotti pawlte hi an beidawng duh bik miah lova, City lakah khelchhe zawkah tang mahse an tlusawp rei ngai lo. Minute 33-naah striker Karim Benzema a inlar a, Real beiseina siam turin Ferland Mendy cross chu goal-ah a khung.
First half-ah City in Mahrez-a goal khung loh an ui ang. Vengtu nei lo Phil Foden pe lovin goal-ah a pet a, goal zawnah a kal lo.
Second half-ah pawh inkhel a danglam thui lova, Spanish club an vannei a, Manchester City in huntha an hloh leh thin. Mahrez bawkin goal ban a pet per.
Mahse goal hnihna hma an hruaina an tinung lehnghal a. Vengtu nei lova awm leh thin Foden-a’n Fernandinho ball cross chu minute 53-naah a ti lut.
Ancelotti pawlte erawh an bet rei lo nawn leh a, Vinicius Junior-a’n a thiam lantirin Fernandinho a tlan pelh hnuah anmahni goal lam atanga ball tlanpuiin goal ropui Real Madrid tan a khung.
City in goal li na minute 74-naah an khung a. Inkhel referee Istvan Kovacs chuan Man City advantage a pek chu remchangah la in Bernardo Silva chuan goal mawi a khung leh.
Blancos bawk a tawp thlenga beidawng lova tangin tunhnaia penalty vawi hnih thelh Karim Benzema chuan Aymeric Laporte handball vanga penalty an hmuh chu a pet goal a. Inrintawkna lian tak lantirin ‘panenka penalty’ petin a goal a khung.

Inkhel zawh lam
Manchester City in an muala inkhel an kaihruai hneh a, Real Madrid in ven ngaihna an hre lo fo. Chutihrualin goal hmaah an che fuh thin lova. Mahrez-a’n thutlukna dik siam thin se first half-ah chiang takin goal li khung thei an ni.
Lehlamah Real Madrid tan beisei tur a la awm a, kum 34 mi striker Benzema chu an player pawimawh ber a nihna lang lehin goal hlauhawm an insiam thinah a pawimawh.
City manager Pep Guardiola chuan, “Football match ropui a ni. Kan theihtawp chhuahin kan khel a, Real Madrid hi team tha an nih angin remchang an lak hun a awm ngei ngei dawn. Leeds kan thlir anga, chuan Madrid lamah ngaihtuahna kan seng leh ang.” tiin inkhel zawhah a sawi.
Real Madrid manager Carlo Ancelotti pawhin, “Football ngainatu ka nih angin inkhel ropui tak a ni. Real Madrid manager ka nih angin goal thum kan khung kha a lawmawm a, mahse kan goal kan veng tha tawk lova, hma kan sawn a pawimawh. Tunah Bernabeu-ah huntha kan la nei a, final luh theihna hun kan nei.” tiin inkhel a thlirlet ve bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427