Tel Aviv University chuan an zir chiannaah kum liam ta khan khawvel pumah Judate huatna (anti-Semitic) avanga thil thleng a pung nasa hle tih an hmu.
An thil hmuhah hian United States, Canada, UK, Germany leh Australia-ah te pawh Judate huatna avanga thil thleng a pung nasa hle tih tar lan a ni.
Report an siamah Judate huatna thil thleng hi chibinga kal duhna politics thu vir velte social media-a pho lan nasat vang niin an tar lang bawk.
Report hi Israel-in Nilaini zan atanga an hman tan, Holocaust Remembrance Day-ah chiah tihchhuah a ni.
Israel rama Yom HaShoah an tih hi Indopui II-na hun laia Europe hmun hrang hrangaNazi Germany-in Juda maktaduai ruk chuang an thah hriat rengna a ni.
Tel Aviv University-a Faculty of Humanities hnuaia mi, Center for the Study of Contemporary European Jewry-in zir chianna an neih, Anti-Semitism Worldwide Report 2021 hi khawvel hmun hrang hranga zir chianna khaikhawmna a ni a, dan leh thupek kengkawhtu, chanchinbu leh Juda pawlte atanga an thu dawn nen khaikhawmin an tar lang a ni.
“Kum 2021 chhung khan Judate tamna ram tam takah anmahni huatna avanga thil tih a pung nasa em em a ni,” an ti.
Report siamtute chuan May, 2021-a Gaza Strip-a Israel leh Palestinian helho intihbuaina khan Judate huatna avanga thiltih a thlentir tam niin an sawi.
Nikum khan Israel leh helho hi ni 11 indovin Gaza-ah mi 261 an thi niin United Nations chuan a sawi a, Israel-ah mi 14 an thi bawk.
Report-ah hian social network tha tawh taka thu dik tawk lo thehdarh thin chuan nghawng tam tak a nei niin an tar lang bawk.
Covid-19 leng avang khan Judate chunga tuanna pawh a thlen phah nual niin report-ah hian tar lan a ni bawk.
“Kum 2020-a hripui a len hnuah khan thu mak tak tak vawrh darh niin khawvel puma a darh chhana Juda leh Israel puhna awmte khan anmahni huatna a hring a ni,” an ti.
“Inkharkhip laiin miin inah social media an khawih nasa si a, chutiang thu dik tawk lo leng chu an hriat avangin Juda huaina a tam phah a ni,” an ti bawk.