Aizawl: BJP National Gen. Secretary, hmarchhak bialtu, Ajay Jamwal-a’n MNF party chu Delhi-a BJP thian, Mizorama BJP paih thlak tumtu an nih thu sawiin, “Hetiang ze nghet nei lo leh mumal lovin Mizoram mipui an hruai hi a pawi takzet a ni,” a ti.
Jamwal chuan Chief Minister Zoramthanga leh a kaihruaiten dawt hmangin Mizo mipuite an bum rei tawh dawn lo niin a sawi a. MNF Adviser Robert Romawia Royte-in central sorkarin Mizoram BJP aia MNF sorkar a ngai pawimawh zawk nia sawi chungchangah, “Central-in Mizoram BJP aia MNF a ring zawk a nih chuan central hruaitute, union minister-te hi engvangin nge MADC inthlan atana campaign tura kan lo kal, MNF hi central-in a ring ngam lo tih a chiang a ni,” a ti bawk.
BJP National Gen. Secretary chuan, “MNF ministry mumal lo taka kal mek hi kan tihtawpa Mizoram mipui tan sorkar tha tak kan din a ngai,” a ti a. Kum 2023-a Mizoram MLA inthlanah BJP an sorkar theihna tura hma lam hun thlir chunga BJP thawhpui zel turin Mizoram mipuite a ngen.
Jamwal chuan MNF sorkar chu hri leng avangin central sorkarin nasa takin a pui tawh tih sawiin, sorkar laipui atanga Mizoram sorkar sum a dawnte chuan mipui hnen a thleng lo thin nia a lan thu a sawi a. Mizoramah BJP a sorkar chuan PM special package pek an nih tur thu sawiin, central atanga malsawmna tam tak Mizorama a luan luhna turin MNF sorkar paih thlaa BJP sorkar din ngei ngei turin Mizoram mipuite a sawm bawk a ni.