Mipui zawng zawng tana thawk tur sorkar kan din ang : Lalsawta

Aizawl: MPCC President Lalsawta chuan mi mal aia ram an dah hmasak tur thu leh mipui zawng zawng tana thawk tur sorkar an din tur thu a sawi.
Congress Bhavan-ah nimina MPCC Friday Political session neiha thu sawiin Congress party president hian party chhiat ber lai pawha rinawm taka awm tlat an mi leh sate chu an phu ang tawk leh ram tana pawi khawp ni lo thilah an induhsak ve tur thu a sawi a. Chutih laiin ram hmasawnna hnathawh tithuanawp tha khawpa induhsakna hi an tum ve loh thu sawiin, “Party induhsakna avanga Tuirial Hydel Project pamtul thak te, party mite induhsak tum luat avanga Falkawn Referral Hospital pamtul thak angte kha thlentir kan tum lo,” a ti.
MPCC President hian Congress party chuan mimal aiin ram an dah hmasak tur thu sawiin, “Mipui zawng zawng tana thawk tur sorkar kan din dawn a, chutah chuan mi tin tan hamthatna a awm vek dawn a ni,” a ti bawk.
Healthcare bill tang tam lutuk avanga Mizoram mipuiin harsatna a tawk chu pawi a tih thu Lalsawta hian sawiin, “Healthcare rinrawla hmangtu mi rethei tam takte mangang au rawl hi kan hre vekin ka ring. Tunah chuan thla thum dan zelah Finance Department-in healthcare atan Rs. nuai 400 an pe chhuak thin a. Chuti chung chuan bill tang a tam em em a, mipui mangang au rawl hi a ring tawh hle a ni,” tia sawiin healthcare chungchangah hian Mizoram mipuite hi chhanchhuah an ngaih thu leh a chhanchhuak turin Congress an sorkar leh a ngai tih a sawi.
Lalsawta chuan tunah hian healthcare Corpus Fund pungte, central atanga healthcare atana lo kalte, state fund atanga an dah zawng zawngte awm ve bawk mah se, hei hian mipui mamawh a phuhruk zo lo a, vaibelchhe tam tak leiba a tlingkhawm ta a nih thu a sawi a. “Congress kan sorkar leh a nih chuan he harsatna hi kan nuai bo ang a, kan sorkar hmasaka kan tih ang bawk khan a hun takah bill hi kan pe leh ang,” a ti bawk.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427