Mipui lamin ngaihdan kan siam thiam a tul thin
MPCC president Lalsawta hoin Congress party in theihtawp an chhuah chho zel a, an tihdik lohte siam tha a, tha zawka ke pen ngei tumin an auhla pawh a ni nasa hle. An party hruaitu lawkte pawhin an hotuten duhsakin inthlanah seat pawh chang se, mipuiin an duh zawng an nih loh chuan in candidate loh pawh an huam thu hial an sawichhuak tawh bawk a, engtin tak ni chho zel ang maw?
Rorellai MNF party lam pawh an inlungrual tha sauh emaw tih mai turin mipui lamah an dik lohna thawm puan tur a tam lutuk lem lo a, party chhung boruak tha lo an neih thawm hriat zui tur a awm ta mang tlat lo bawk. A lo ni tak tak nge, tak tak lo pawh hiatzui thiam a har hle.
ZPM pawhin thawm nei ve zelin, anmahni tawkah an phur chho ve zel a, eptu lama seat ngah ber an nih avangin an inlungrual rih viau niin a lang bawk. Mahse, eirukna do tur hian an tangrual thei tawk ang em, tih chu mipui thlir ber a la ni rihin a hriat thung a ni.
Thatna lai leh that lohna lai nei vek kan ni a, party hrang hrangte pawh hian an nei vek ngei bawk. Mipui lam hian chutiang thleng chuan kan lo thlir thiam ve a, a tam zawkte phei hi chu thudik pawh ni lo, an pawl ni lo lamte atanga chhuak tawn kual vel mai mai a ni thin tih kan hriat ve te pawh hi a ngai. Kan duhna leh ngaihtuahna fim tak nena tha nia kan hriat ngeite puih zel mai hi kan tihtur zawk a ni tih i hrereng zawk ang u.