- Mahmuaka Chhakchhuak
Krista chauh kan thlir loh avanga buai lohna tura kan buai tam tak dante hi sawi tur a awm teuh theiin a rinawm. Kohhranah rawngbawlna pawimawh tak kan chang a, chanvo sang tak kan han chan bawk avangin thawhlawm lamah pawh midang aia pek tam deuh hlek alo ngai a. Chu chauh niloin inkhawmna hmunah ngei pawh tlar hma lamah thut alo ngai bawkin khuang rik apianga lam hmahruaitu nih chu alo mawi zawk zel bawk avangin thlarau lamah pawh inlak fit lehzual alo ngai a. Thawmhnaw lamah pawh nalh pangngai tak mai bakah nghawngawrh sen lar tak awrh chu alo inhmeh bik bawk zel avangin khawlum leh vawtin a tihdanglam theih loh ang maiin Tie-sen lar tak chu awrh fo alo ngai bawk a. Heng zawng zawng hi kan hmaih palh a nih chuan rawngbawltu tlak loh ang hiala ngaih theih kan lo nih mai dawn si avangin tisa tak pawha tan lak a ngaihna tur hi a tam thin hle awm e.
Kohhrana kan chanvo chelh chuan Pathianthu lamah pawh koh thut pawha hlam chen tal sawi thei tura ngaih kan nih tel bawk avangin Genesis leh Thupuan inkar chhungthute chu kan thinlungin a hawl kual zung zung alo ngai bawk a. Pulpit tlanga thu ngai reng sawi chu ngaithlatu tan alo ninawm mai dawn avangin thu pathum emaw tal chu bel taka kan vawn khiau a ngai bawk ang. Heng zawng zawng hi Krista telloa inbuatsaihna tur thil pawimawh tak taktea mi thenkhatte chuan kan ngaih leh kan neih a ni. Pathianni zingah thawhlawm khawn kual paha kohhran In karki tak takte chu tlawh alo ngai bawkin tawngtaina neih pawh a ngai fo bawk avangin thil dangah rilru a pek hman meuh ngai loh a. Midang angin Politics te chu sawi chak hle thin mah ila kohhrana rawngbawltu pawimawh tak kan nih tlat si chuan chungte chu Diabola hmanrua ang hiala ngaih chang pawh alo awm thin bawk tura ngaih a ni. Krista telloa kohhran rawngbawl hi a hautak a, a hahthlak bawk a, kan rawngbawlsak mipuite tan ngei pawh hnu-hnang a awm lem lo thin bawk a ni. Hei vang hian tupawhin kohhrana rawngbawlna neih kan duh a nih chuan Davida angin mahni pawh insengso huamin rawngbawlna nei sela lungawi tak chungin rawngbawlna nei mai rawh se (II Samu. 24;24).
Krista chauh thlir loh avang hian kohhran rawngbawltu tam takte pawhin harsatna kan tawkin buaina tam tak kan tawk ta thin hi pumpelhna kawng pakhat awm chu Krista chauh thlira rawngbawlna neih hi a ni. Kan rawngbawlpuite kan thlir a, kohhran mipuite kan thlirin kan then leh rualte thlenga kan thlir bawk avang hian kan rawngbawlna hian a chak tur angin a chak loh phah thin. Mi zawng zawng tihlawm tura ngaihna kan neih avangin fimkhurna tur hi a tam bikin kan hria a, tawngsual kan hlauh bawk avangte hian kohhrana kan rawngbawlna ngei pawhin a tawrh phah bawk thin a ni. Hei vang hian Krista chauh thlira rawngbawlna kan neih hi kan chakna ber tur a nih mai bakah kan rawngbawlna ngei pawhin a chakna ber tur a ni.
Kohhran rawngbawltu ni chiah lote pawh ringtu kan nihna kawng theuhah kal fimkhurna tur hi a tam hle mai. Kan din khawchhuah theihna tura eizawnna kawng hrang hrang kan zawhna mai bakah thenawm khawvennaah ngei pawh ringlotute pawhin an tih duh loh tur thil tam tak kan ti thin tate hian chunglam atanga hremna kan dawng ta emaw tih mai turin harsatna chi hrang hrang kan tawk thinin, ringtu kan nihna zawnah ngei pawh kan tluan loh phah emaw tih mai tur a ni. Ajinomoto-a chini nawi pawlhte, Khawnvartuia tui pawlhte leh Buk lung dikte mai bakah kan Cubic lungte hi Cubic tling dik tak a ni ang ngem tihte hi kan pi leh pute thelret hralhnaa lung dah nachang an lo hriat tawh atanga ngaihtuah chuan thil mak tak pawh a nih loh theihna a awm tho awm e. Hetiangte hian kan chhehvela hnam dang, ringlotu zawk nia kan ngaihte hian an ching ve ang ngem le?
Kristian kan nihna hi keimahni inpawm dan mai chauh te hi a ni ang tih hlauhawm tak a ni a. Kristian tha tak emaw kan lo intih lai hian tute emaw chuan kan zinga tel an lo chak lo viau maiin min lo hmu danglam viau mai thei tihte hi ngaihtuah tel a tha hle awm e. Kan Jerusalem – Aizawl khawpui chhunga thil thleng thin tam takte leh a chhunga chengte mizia tam takte hi ringlotute tana hriat nuam lem lo tak takte hi a awm ta fo mai bawk si avangte hian kan kristianna hi chunglam atanga nemngheh a ni lo mai zawk em ni ang tih pawh hi rinhlelh theih tak tur a ni. Khawilai hmunah mai pawh CCTV dah alo ngai tain kan kawngka te ngei pawh Tala lian tak taka kalh alo ngaih takna chhan hi hnam dang leh ringlotute vang chu a ni chiahin a rinawm loh a, kan kristian-pui leh Biak in pakhata kan lawipuite vang a ni tiin sawi ila kan thin anat loh hram ka beisei.
Heti em ema lemchang si loa lemchan nun kan uar ta mai pawh hi ngaihtuah tham tak a ni ta a, khawilai hmunah mai pawh lemchangte zawk chu an lo dinchang zawk zel emaw tih tur a ni ta hial mai hi a thinurthlak ta viau zawk mai. Zu in chu misualah kan ngai a, zu in zingah pawh a rimnam chu kan han hmu he nghal maiin rimnam lem chiah loa lo rui thote chu mi pangngaiah kan ngai thei ni te hian a hriat a. Zu in hrim hrim tiin hrutrual vek lah chu thil harsa tak a nih bawk si avangin Sunday School zirtirtu zingah lo lem ve zauh zauh thinte pawh an nam lem loh chuan kan hmu pangngai mai theiin a hriat. Tin, kan ramin a chhiatpui sualna tam tak zingah Zu leh ruihhlo dangte hi kan han dah lansarh viau laiin Eirukna leh hlemhletnate hi kan ram hian a chhiatpui nasa zawk lo ang maw tih pawh hi ngaihtuah tham a ni awm e. Kan Pathianthuin ‘Sual doin thisen chhuak khawpin inla tang lo e’ a tih hi Hnam dangte nena kan inkara boruak a awm chauhin hre chhuak lo ila keimahnia Pathian min hlat tir theitu thil chi hrang hrangte beihlet a ngaih hunahte hian hrechhuak thin ila a tha awm e. Hei vang hian Kristian kal fimkhur rawh tih hi tu tan mai pawh a lo tul hle mai a, engtik hunah mai pawh hian sawi rik fo ngai alo ni ta hial mai zawk awm e.