Aizawl: Deputy Chief Minister Tawnluia chuan kum hnih chhung hripui laka invenhimna kalpui a nih hnuah kumin atangin sorkar flagship programme SEDP chu chhungkaw lam hawia kalpui a nih tur thu a sawi.
Inrinni khan Bawngkawn vengah Aizawl N-I biala Gorkha Unit-6 chhunga mi thar lawm luhna hun buatsaihah thu sawiin Tawnluia hian, “Mipui vantlang dawm kang tura hmachhawp kan siam mek laiin hripuiin min tibuai a. Kum hnih chhung invenhimna kan kalpui a. Khatih chhung khan hmasawnna ruhrel (infrastructure) lian kan thawk reng a. Kuminah erawh chuan chhungkaw lam hawiin chhungkaw 60,000, bial tinah chhungkaw 1500 kan target,” a ti.
SEDP Governing Board hnuaiah Executive Board, District Level, Village Level-a Committee din a nih thu leh program duante sawiin, “Governing Board-in min approve tawh a. Khawpuiah pawh hmalakna tur tam tak kan siam tawh a. Nakinah chiang zawkin kan la puang dawn. Kuminah hian thawh khatna kan kalpui ang a, nakumah thawh hnihna, chutiang zelin kum tin kalpui tura ruahman a ni,” a ti a. SEDP beneficiary-te thlangtu tur chu Aizawl khawpuiah chuan local council-a committee te, village level-ah VC-a committee dinte an nih thu a sawi.
MNF Sr Vice President ni bawk, Tawnluia hian MNF chu hnam hnuaihnung (minotiry) zawkte chawikangtu leh Gorkha-ten land pass an neih theihna tura hmalatu a nih thu a sawi a. “Gorkha-te chu Mizote nen unau anga awmho thin kan ni a, MNF chuan Mizorama pianga sei lian Gorkha-te tan hun rei tak anmahni ram anga an lo enkawl tawhte land pass kan pe tawh a. Kan memorandum of settlement-ah pawh Mizorama minority-te tan chanvo kan humhimsak tlat a, chu’ng zinga mi chu Gorkha-te hi in ni,” tiin, Congress-in a tih duh miah loh kha MNF chuan ram leilung faah Gorkha-te a pawm thu a sawi bawk.
“Mizoramah hian minority community a awm nual tih sawiin Tawnluia hian, “District council chhungah pawh hnam tenau zawk tam tak an awm a. Lunglei leh Aizawl khawpuiah pawh tam tak an awm. MNF chuan India nen kan inremna – memorandum of settlement-ah pawh minority-te chawikanna tur kan dah ngat a ni,” a ti a. Sorkar deptt-ah pawh minority affairs deptt kan nei angin party-ah pawh MNF chuan minority deptt an neih thu a sawi a ni.
MNF Sr. Vice President hi Lalthanzuala Hnamte, General Secretary, MNF Hqrs leh hruaitu thenkhatten an tawiawm a ni.