Aizawl: Aizawl khawpui laili atanga Zokhawsanga an insawn chhuah tur chungchang chu Mizoram sorkar leh Ministry of Home Affairs (MHA) inkar a nih avangin sawi theih an nei lo tih Assam Riles hotuten an sawi a, MHA atanga thupek an hmun hunah erawh an insawn chhuah mai tur thu an sawi.
Inrinni khan Aizawla hmunpui nei, Assam Rifles ‘Lakhimpur Battalion’ hotuten chanchinbumite chhun chaw an eipui a. Tuna an awmna hmun atanga an insawn chhuah hun tur chungchang chanchibumiten an zawhna chhangin, “He thil hi state sorkar leh MHA inkar a ni a, han sawi belh vak tur kan nei rih lo,” an ti.
MHA atangin thudawn an la neih loh thu an sawi chhunzawm a, an awm zel dan tura thuneitu MHA-in ‘Zokhawsangah insawn tawh rawh u,’ an tih erawh chuan an awmna thar tur chu an pan mai tur thu an sawi.
Aizawl hmun lailia an awmnaah hian sulhnu tam tak an lo hnutchhiah tawh avangin chhuahsan vek thei an ni lo tih Assam Riles hotute chuan sawiin, “Heritage thil tam tak a awm tawh a, kan insawn chhuah hunah pawh a vaia han chhuak tur erawh kan ni lo,” an ti bawk.
Lakhimpur Battalion hotute chuan an battalion dinhmunte chanchinbumite chu an hrilh a. December 6, 1862-ah Dibrugard-ah bul an tan thu te, kum 50 hnuah Lohitpur, Arunachal Pradesh-ah insawnin July 6, 2021 khan Aizawlah an sawn leh tih an sawi.
An battalion-in indona leh thil dang tam takah hna a lo thawk tawh tih chanchinbumite chu hrilh bawkin, sipai huaisen chawimawina dawng pawh mi eng emaw zat an awm tawh thu leh tanpui ngaite tanpui kawngah pawh nasa taka ke an lo pen tawh thu an sawi bawk.