Premier League champion Manchester City in Inrinni tlaia Liverpool in an tlan pel hnuah duhthusam a ringin an chhanglet a. Tlan pel letleh nghal turin Leeds United 4-0 in an sawp.
Liverpool in Newcastle United an hneh hmasak zawk avangin Premier League table chung ber an luah a, City in Elland Road khelmual an luhin chetsual an tan a thiang lo tih an hria.
Tlak hlauhawm a awm mek Leeds lakah ‘pressure’ sang mahse City an buai phah lo. First half minute 13-naah goal an khung a, Leeds lamin beisei nei takin halftime thleng mahse second half-ah City in inkhel an dahtha.
Phil Foden-a freekick chu minute 13-naah Rodri chuan a tauh lut a. Leeds in City hi halftime hma zawng chu fakawm takin hmachhawn mahse goal hlauhawm an insiam mang lo.
Second half tan hnu lawkah City in goal an khung a. Nathan Ake chuan an goal hnihna a khung a. Foden bawk City goal a inrawlh lehin Gabriel Jesus-a khung tur a siamsak a. Huntawp dawnah Fernandinho chuan an goal li na a khung ve leh bawk.
City an chak avang hian khelh li la awmah City hi point khatin Liverpool aiin an la sang zawk.
Manchester City manager Pep Guardiola chuan title inchuhna chungchang sawiin, “He dinhmunah hian vawi tam tak kan ding tawh a, pressure lam pawh a ni lo. Kan tih ngai a chiang, kan chak vek a tul a, a nih loh chuan Liverpool an champion ang.” a ti.
An inkhel chungchang sawi belh bawkin, “Player te an kheltha em em vek a, squad lamah harsatna neuh neuh awm mahse kan kheltha. Minute 25 chhung vel kha an insiamrem nghal zung zung avangin kan tan a harsa a, mahse a bak chu kan kheltha hle.” a ti.
Reds an la dam
Inrinni tlaia inkhelah Liverpool in nung taka football khel Newcastle United chu 1-0 in an hneh a. City an um chhunzawm zel.
St. James’ Park a inkhelah Jurgen Klopp-a’n player panga a thlak danglam a, an top scorer Mohamed Salah chu UEFA Champions League inkhel tur thlir telin substitute bench-ah an dah.
Newcastle in bul tan tha hle in Liverpool in an tisual dawn a ang hman hle a. Mahse Reds in minute 19-naah Naby Keita hmangin goal an khung a, goal an neih hnuah inrintawkna nei sawtin a tawp thlenga tang tluanin buaina lian an tawk lo.
Sadio Mane chuan Reds tan goal a khung belh tauh a, Diogo Jota goal khung tur pawh Martin Dubravka chuan a dansak.
Newcastle tan Miguel Almiron chuan an si phurh sut emaw ti hman mahse a goal khung chu offside avanga pawm a ni lo.