April 30, 2022, Inrinni tlaia Mizoram hmun thenkhata ruah, thlipui thawk leh rial tlain khaw eng emaw zatah chenna in tam tak chu luah tlak loin a tichhia a; mihring thi leh hliam an awm hriat a ni lo.
Saitual district chhung, Phuaibuang khuaa rial tlain chenna in 287 chung rangva a deng chhia a; in 72 chu riahna tlak loh khawpin a deng chhia a ni.
Phuaibuang khuaa rial tla hi a lianin artui tiatte a ni hlawm a, in tam tak chung rangva deng chhe mah se mihring leh ran thi leh hliam an awm lo hriat a ni lo a; huan thlai erawh a deng chhe nual nia thudawn a ni.
Rial tlain a den chhiat inte thawm that hnatlang chu nimin khan khawtlang huapin neih a ni a, bialtu MLA Lalrinliana Sailo-in silpaulin thahnem tak a pek bakah rangva bundle 250 ruahmanin Silchar lamah ngaihtuah mek a ni.
Mamit district-ah pawh ruah sur nasa leh thlipui thawk avangin khaw pathumah in 60 chuang a chhia niin Mamit DC hnuaia DM&R branch-in an chhinchhiah.
Mamit DC office chhinchhiah danin Hmunpui khuaah chuan thli tleh leh ruah sur nasain chenna in 47 a tichhia a, Bazar vengah in pathum leh Venghlunah in pahnih a chhe bawk a, Andermanik khuaah chenna in pariat chu thliin a len chhia a, in paruk chu luah zui tlak lohin a chhia.
Hnahlan khuaah pawh thlipui thawkin chenna 12 vel a tichhia a, heng bakah hian winery building te, Vengthlang Presbyterian Kohhran Centernary building te, UPC Saron Sunday School Hall leh Salvation Army Prayer Hall te pawh a chhe nual bawk.
Khawzawl district chhung, Tualpui khuaah pawh Inrinni tlaia thlipui thawk khan Lalventhanga in, Lalrinchhana te luah lai chu chen zui theih loh khawpin a chhem awn a, S Lianzama in chung rangva leh a chung relte a len thla vek bawk.
Tualte khuaah pawh rial tlain chenna in paruk chung rangva a deng pawp vek a, chen zui nan a rem rih tawh loh avangin an chhungte inah an insawn chhuah phah a ni.