Real Madrid chuan Inrinni zanah Espanyol lakah goal li an khung a. Point thum hmuh belhin La Liga-ah an champion.
Real Madrid champion puitu coach Carlo Ancelotti chu European football chanchin a league lian panga a league title chawi kim hmasa ber a ni.
Santiago Bernabéu a inkhelah Real Madrid tan forward Rodrygo chuan goal hnih a khung a. Marco Asensio leh Karim Benzema ten goal khat ve ve an khung.
La Liga-ah khelh li an la hmabak chungin Real hian point 17 in hma an hruai a, pelh theih an ni tawh lo.
Champion tura point khat chiah mamawh chungin Real in inkhel bul an tan a, minute 33-na a Rodrygo-a’n goal a khung hnuah chak tur a chiang nghal hle.
Ancelotti a ropui e
Zinedine Zidane-a’n a hna a chhuahsan hnuah Ancelotti hi Real in nikum nipuiah Everton atangin an ko let a. Kum 62 mi hian Serie A, Ligue 1, Premier League leh Bundesliga te a chawi hnuah La Liga a chawi.
Kum 2013 atanga 2015 inkarah Real tan trophy lian panga chawi mahse Spanish league hi a chawi loh langsar a ni a. Tun season-ah UEFA Champions League chawi thei turin beisei an la nei a, an hlawhtling a nih chuan Ancelotti hi Champions League vawi li chawi thei manager awmchhun a ni ang.
Kum 2004 khan AC Milan chu Serie A title a lakpui a, kum 2010-ah Chelsea champion puiin kum 2013 khan Ligue 1-ah Paris Saint-Germain a hlawhtlinpui leh a. Kum 2017 khan Bayern Munich a champion pui bawk.