Aizawl: MNF Adviser Lalruatkima chuan state-a sorkar lai nena zai khata luang thei tur Mara Autonomous District Council (MADC) sorkar din a pawimawh thu a sawi.
MADC inthlan lo awm tura Saiha, AOC pump kianga MNF-in street campaign Inrinnia an neihah thu sawiin Lalruatkima hian, “State sorkar nena zai khata luang za a, engkim tiho thei tur state-a sorkar lai MADC inthlanah hian in thlantlin a pawimawh hle a ni,” a ti.
RD Minister Lalruatkima hian MNF sorkar chak tak state-ah a sorkar mek a. Chu sorkar chak tak chuan kawng hrang hrangin hmasawnna a kalpui mek a. Chu hmasawnna luipui luang mekah chuan thuk lehzuala an inhnimphum theih nan MNF party vote tling tura tiin, “State-a sorkar lai ngei district council-a sorkar siam hi a finthlak takzet,” a ti.
MNF-in sorkarna a chan hnuah Zoramin kawng hrang hrangin hma a sawn nasa tih sawiin Ruatkima hian, “Siaha bikah pawh state sorkar hmalaknain tuia harsatna nasa tak kan tawh thinte a lo ziaawm ta hle a. Hospital felfai lo tak thin a lo thar ta sur a, police station tha lo tak thin pawh a lo tha ta hle a ni,” a ti.
Lalruatkima chuan Mara District Council-a sorkar mek, BJP chungchang sawiin, “Kum thum MADC-a an sorkar tawh chhungin beisei tur a awm lohzia kan hmu chiang hman a. Beisei tur awm lo thlan tlin nawn hi Mara mipuite hian inba lo. Anmahni atang hian an zawrh ber, direct funding emaw 6th Schedule Amendment emaw beisei tur a awm lohzia a chiang em em a ni,” a ti bawk.