- Lallunghnema, Charity Lodge
Tun hnaiah hian Mizoram pawn lama Consumer Commission thenkhat thubuai remna ka rawn tarlang zeuh zeuh a. Khang thubuai remna ka rawn tarlan thenkhatte kha India ram puma inzar pharh mek Consumer Advocacy Group WhatsApp Groupa Memberte thu rawn thawhte a ni hlawm a.He WhatsApp Groupah hian India ram hmun hrang hranga State hrang hranga Consumer Commision-te ,Supreme Court leh National Commission Judgement pawimawh tak tak tarlan a ni thin a.A bengvarthlak thei khawp mai..Kei pawhin eng eng emaw hi ka zu thawh ve thin a.Ka thianpa,ka rawngbawlpui Pu Dinpuia of Serchhip pawhin a zu thawh ve thin a ni.A ti tha hle mai.Ka article te pawh ka post bawk thin.Chhiar thiam lo mahse,ka article -te chu an lo lawm ve thei viau a ni.Tlem lai khan Consumer pual bik atana ka lehkhabu ziah 6-na Consumer – 2020 for awareness hlim thla chu ka zu thawn a.Ti tha min ti ve khawp mai.Sawi leh sawi hnu,khu lamho khu zawng ban sawm nei pathian bia e ti lovin keini Pathian nung beho ai chuan zu changkang zawk tlat zel a maw le!Zu huaisen zawk tlat thin a maw le!Keini Kristian,Lal Isua ringtute hian kan entawn zel zawk rih a nih hi!
Ka article chhuak hnuhnung berah khan deficiency in service chungchanga mi thenkhat hlawhtlinna ka rawn ziak deuh nual a.Pa lar tak pakhat,consumerte hmakhaw ngaitu a balu chah loh zawk lei luihtir tum a nih chungchang a,Balu chhia leitir tumtu a vau zam thu kan sawi a nih kha!
A duhthusam lo chunga nu pakhat motor hlui lei luihtir tum chungchang pawh ka thai lang hlek . Consumer-in a duh lo chunga thil inleiluihtir hi Consumer Protection Act kalh a ni.Dan anga hrem theih a ni,tih kan sawi tawh.
Nimin maiah pawh khan Taxi driver pakhat chuan Cheng za sarih man vel motor part a lei sual thu leh , thleng leh a tum chu part zuartuten an lo rem tihsak loh thu leh a lungawi loh thu min hrilh. Motor part zuartu pa chuan,”Sumdawng dinhmun hi min hriatpui ve ta che u,part tha chauh a zawrhin a hralh theih loh,”a ti then a.Hei hi Consumer-te rahbehna lian tak a ni. He dawrkai hian Consumer right hi a hre lo hle a.Bungraw hman tlak lo zawrh leh hralh pawh Dan bawhchhiatna a nihzia a hre lo a ni.Mi mawl zinga thuttir chi niin a lang e.He motor part leitu lah hi a lo huaisen lem lo ni ngei tur a ni,a ngawih tak Mai Mai thu min hrilh chuan min tilungngai hle.Kristian rama dawrkai tam zawk hian a thlawna mi sum ei an hreh lo chu a ni phawt a,Isua hnung zuitu rinawm Kan inti theuh si a.Thil sawi fo loh chi ka sawi a nih hi! Mahse, heng ka sawi chhuahte hi inzir nan kan hmang tur a ni.
“Bungraw chhia lei suh,
I lei hmain bel chiang hmasa rawh.
Cash memo la zel rawh,”kan tih thin hi!
Bungraw chhe hralh avanga, a chuang a liama consumerten pawisa an senso nasatziate,MRP aia sanga miin thil a lei avanga a sum a sen belh nasatziate hi chhut sen pawh a ni love.Tuna kan mamawh ber chu sumdawng dik,dawrkai dik,consumer huaisen a ni.
Thlawhtheihna Service leh passenger-te eiin siamsaktute hi service provider an ni a.An service leisaktute leh hmansaktute chu consumer an ni a Dikna leh chanvo an nei a ni.Chutiang bawkin thlawhtheihna a, eiin titute chu consumer an ni a,dikna an nei a,an chanvo pawh an chang ngei tur a ni.Hetiang thu hi kan sawi zing ta malh malh hle. Mahse, a tul si a ni.
Engatinge tih tur nei mumal lo ram vei inti tam takin political party a luh an uar em em!? NGO chi hrang hrang a inhmanna tur a tam teh reng nen.Heng Consumer inzawmkhawm Pawl MCU-te,Society chi hrang hrangahte hian an thiamna leh finnate chu han sawr chhuak se,ram tan thil ropui tak an ti em em dawn a ni.He zawhna hi chhan chakawm tak, chhan thiam har tak chu a ni.
Hei hi lo chhiar teh le:
Mumbai khawpuia pisa nei SOTC Travel Company chu an thutiam anga Canada Tour an ruahmansak loh avangin Telangana State Consumer Disputes Redressal Commission chuan thiam loh chantirin pawisa a chawitir a.Judgement Order chhuah atanga ni 45 ral hmaa tipuitling ngei turin he Travel Company hi hriattir an ni.
Wing Commander VS Reddy leh a chhungte 2 chuan SOTC sponsored- in Canada leh USA lama zin chhuah an tum a.Pawisa pawh nuai hnih advanced-a an pek bakah reimburse leh theih turin Rs 80000/- an pe theuh bawk a ni.Mahse an intiam anga Canada ram thlen hmain USA ah an sponsorship chu an tihtawpsak a.Hei Vang hian wing Commander leh a chhungte chu USA-ah an tangkhan phah a.Helai a an tangkhan chhung hian Travel Company SOTC ngaihsak an hlawh lo bawk.Chuvangin District Consumer Forum hnen kalin complaint a theh lut ta kha a ni a.A kipa kawiin kan sawi lovang aSection2(11) of the Consumer Protection Act,2019 hmangin Deficiency charge-in he Company hi thiam loh an chantir ta a ni.He travel Company hian lungawi lovin Telangana State Commission hnenah zualkovin an appeal ve leh ta a.Mahse,Telangana State Commission chuan District Forums thutlukna chu pawmpuiin he Travel Agent,SOTC hi Rd 80000/+ a chawitir bakah thubuai buaiipuinaa senso Rs 20000/- rul turin thubuai remna a ti chhuak ta a niJudgement tih chhuah atanga ni 45 chhunga tihpuitlin tur a ni.
Ram pawn lam thil ka han ziak ta thin a . Ka tum ber chu awareness a ni e. A fik a fakin ka ziak lo ta mai. Tunlai khawvelah hi chuan social media hmangin chanchin thar ber ber kan hre thei tawh a. Kan thil hriat duhte chu kan hre zung zung thei tawh. Kei pawh hian ka duh duh ka hre thei a ni ta ber mai. Ka Mission hi a theu neu lo, consumer te chhan chhuah a ni. Eng mission dang mah ka nei lo. He service -ah hian ka hlim em em a ni.
Chhuak lehah chuan Re 1/- thubuai ka rawn ziak dawn! A bengvarthlak leh viau ang! Lo chhiar leh ngei ang che aw?