Maoist hel pawla mi, thuneituten a lu mana Rs. Nuai 5 lai an chhiar chu Odisha-a Kalahandi district-a police hnenah a inpe tih officer pakhatin Thawhtanni khan a sawi.
Lalsu, Sendhu tih leh Laxman Apka tia an koh thin bawk, kum 50 mi hi Bijapur district, Chattisgarh-a mi niin Ganglore police station huam chhunga awm a ni a. Kum 2009 khan Ganglore Dalam-ah kum 17 mi chauh a nih laiin hel pawl hi a zawm a, kum 2011 khan Odisha-ah a insawn lut a ni.
Odisha-a a luh hnuah hian BGN (Bansadhara-Ghumsur-Nagabali) division, Kalahandi district-ah nasa taka chein tunah hian Area Committee-ah secretary a ni mek a. DIG Rajesh Pandit, SP Kalahandi Savarna Vivek leh CRPF Commandant Biplab Sarkar te hmaah a inpe ta a ni.
SP chuan Lalsu-a hian dan pawna awma Maoist chetna hrang hrangah hian a tel ve chhan hmuh a beiseina a tlahniam zel niin a sawi a, hei hi inpek a duh chhan pakhat a ni tih a sawi.
Tun hnaia inpe tura a rilru hmintu lian ber erawh Maoist hel pawla tel thin pahnih, Ramdas leh Kalamdei te thuneitute hnena an inpek hnua Kalahandi police-in April 22-a Bhawanipatna reserve police barrack compound-a inneih inkhawm an huaihawtsak kha a ni.
Lalsu-a hi Manaska-a kum 2016-a police leh an pawl inkahnaah te, Barangapadar-a kum 2017 inkahnaah te, Turkey leh Kotalghati-a kum 2019 inkahnaah leh Sohespadar-a kum 2020-ah te pawh khan a tel niin DIG chuan a sawi.
Pandit chuan hel pawla a awm laia a chetna hrang hrangte hre turin thil zawh chian zel a nih tur thu a sawi bawk.
Maoist hel pawl atanga inpete hi state sorkar chuan a chhawmdawl thin a. Surrender & rehabilitation policy a neih mek angin Lalsu-a pawh pawisa fai Rs. Nuai 5 an pek bakah chenna tur in, nupui a neih dawna puihna tur leh lehkha a zirna tur thla tin Rs. 3,000 bakah vocational training an neihpui dawn tih DIG chuan a sawi.
Lalsu-a inpe chu an tan thil lawmawm tak a nih thu DIG chuan a sawi a. Kum ruk kum sarih liam ta atang khan Kalahandi-a Maoist hel pawl inpete chu puih an nih thin thu a sawi bawk.