Online-a zirna kalpui chhungin naupang mit tha lo pung

Covid-19 len avanga kum hnih pumhlum chuang sikul hawn theih lohin zirlai naupang mitah nghawng a nei a, sikul hawn leh a nih hnuah naupangin an mit a fiah lo tih an hre chhuak tan a, tarmit vuah ngai an pun phah hle.
Hri leng avangin kum hnih chuang dan pangngaia zirna in hawn theih a nih loh lai khan online class kalpui thin a ni a, naupang tam zawkin mobile phone hmangin zirtirna an dawng a; hun awl a tam avangin phone leh TV an en nasat phah bawk.
April 5, 2022 atanga mumal taka sikul hawn leh a nih hnu atanga ni reilo teah naupangte mit a fiah lo tih hriat chhuah tan a ni a. Civil Hospital Aizawl-a Eye Department hotuten naupang mit fiah lo, tarmit chawh ngai an pun thu The Zozam Times an hrilh.
CHA-a Eye OPD pantu an chhinchhiahna atanga a lan danin April thla chhunga ni tina OPD pantu zinga zaa 20 atanga 30 inkar chu zirlai naupang an ni.
Eye Specialist Dr Lalhuthangi chuan hri leng avanga inkharkhip hun chhungin naupang inawmtleina ber chu phone leh TV a ni a, hnai tak takah phone an en thinin an mit a tichhe nasa tih a sawi.
Naupangin an mit a fiah lo tih an hriat chhuah dan sawiin, “Sikul an han lut a, blackboard-a zirtirtute thuziakte an hmu fiah thei ta lo a, nu leh pain damdawi in lamah an rawn hruai thin ta a ni,” a ti.
Tun hnaia an mit chhe ta thut a nih an rin loh thu sawiin, zirlai naupang tarmit vuah tura chawhten power sang takte an lo mamawh tawh tiin, nu leh pate pawhin an fate hi an lo chik tawk lo nia a lan thu a sawi.
Mihring mit mu size chu taksa a than chhung a thang ve zel a, mit thaa ngaih pawh a lo tha lo leh thei tih a sawi a, thla ruk danah naupang mit checkup-tir thin turin nu leh pate a chah.
Tunlaia naupang inawmtleina ber chu phone a nih tawh miau avangin phone inkhawihtir loh tawp chu thil harsa a nih a rin thu a sawi a, hetihlai hian naupang mit tha lo zel tur ven nan phone khawih tlemtir chu invenna tha ber a nih thu a sawi bawk.
Civil Hospital, Aizawl bakah mit inentirna, private clinic hrang hrang neitute pawhin sikul hawn tan leh atanga kar hnih hnu velah naupang mit fiah lo inentir an tam thu The Zozam Times an hrilh bawk a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427