Manchester United chuan tun season a an home match hnuhnung ber ni turah hnehna an chang a. Interim manager Ralf Rangnick hnuaia hnehna an chan chian ber tum hmangin Brentford 3-0 in an hneh.
Old Trafford-ah United tan tun season-ah beisei tur a awm tawh lova, season duhawm lo tak hmawrbawk lam an hnaih.
Minute 9-naah Diogo Dalot leh Anthony Elanga te thawhrah atangin Bruno Fernandes chuan chiang takin goal a khung a. United tan goal 50 a khung tling.
Second half-ah Cristiano Ronaldo chuan penalty atangin an goal hnihna a khung a, France defender Raphael Varane chuan an goal thumna ni turin United tana a goal hmasa ber a khung.
Ronaldo hian goal khat pawm loh a nei bawk a, tun season-ah Premier League goal 18 a khung tawh.
Hnehna an chan avangin United tan UEFA champions League beiseina a la nung a, mahse an chung amite result-ah thui tak an innghah tawh avangin an tan kawng a inhawng tawh lo anga ngaih theih a ni tawh. An khingpui Brentford hi chhiarkawp hmangin la tla thla thei nimahsela point 40 an hmuh tlin tawh avangin an dinhmun hi him pha tawh tura ngaih an ni.
United in Thawhtanni zan inkhel hi season tawpa chhuak tura ngaih player thenkhatte hun hnuhnung atan an hmang a. Midfielder Nemanja Matic leh Juan Mata ten lawm an hlawh a. Spanish midfielder in tunhnaiah chhawr hlawh lo mahse a passing fing leh football thluak tha bik a nei tih a la hmuh theih.
Manchester United interim manager Ralf Rangnick chuan United a a hun hmanah a lungawi lo tih a sawi a. “Thlirletin kan result a lungawithlak loh, a bikin tunhnai thla khat chhung velah kan result a chhe hle”
“Champions League khelh kha kan tum a nih avangin tun thla ruk chhung beisei ang a ni lova, hmasawnna lai awm mahse tunhnaiah kan tlahniam.” tiin a sawi.