Hripui avanga hun engemaw chen buatsaih theih a nih loh hnuah Mizoram Amateur Taekwondo Association chuan chuan Thawhlehni khan 1st Session Colour Belt Exam chu a buatsaih.
Mizoram hmun hrang hranga neih tur exam bul tanna hi Aizawl leh Lunglei District-ah buatsaih a ni a. Club 12 atangin taekwondo zirlai 161 in exam tha takin an paltlang.
Aizawl ah exam buatsaihna lian ber Electric Veng YMA Hall-ah yellow belt atanga red belt inkar mi 129 ten exam hi an nei.
Black belt exam thei tura inbuatsaih mek mi 9 ten MATA Hall, Republic Vengthlangah Red-1 exam an nei ve thung.
5th Dan Black belt Master VL. Sawma hovin Black belt H.Vanlalfela, Daniel Lalhumthanga, Doris Lalhmangaihzuali, Christopher, Vanlalruati leh Vanlalmawipuia ten uluk takin theory leh practical exam an endik.
Lunglei SAI Extention Centre a exam buatsaihnaah zirlai 23 ten colour belt hrang hrang pass tumin exam an bei bawk a. Joseph Lalsiama (2nd Dan) leh Black belt Ruthi Lalneihhlui ten exam hi an endik.
Colour belt Exam-ah hian Physical Fitness, basic technique, hand & leg technique, poomsae, self Defence, sparring, breaking, speed endurance te an exam.
1st Session Colour Belt exam hi kar tawpah Mamit ah buatsaih a ni leh ang a. Karlehah Kolasib, Lawngtlai leh Siaha ah te exam buatsaih chhunzawm a ni bawk ang.