Aizawl: MADC inthlan lo awm tura BJP party candidate-te chu Congress party MDC atanga BJP party zawma lalna leh thuneihna duha MDC nih zui tumtute an ni thu C Lalramzauva, Chairman, Legal Board MNF Gen. Hqrs-in a sawi.
Nimina Siaha Press Club-a thu thar thehdarhtute kawmin C Lalramzauva hian Mizoram State Legislative Assembly General Election, 2018 neih zawh takah khan mipuiin Congress an hnawl a, MNF party-in state sorkarah rorelna chelh mah se, MADC hnuaia Congress sorkarna chu a kal pangngaia kalin CEM leh EM-te enkawlna hnuaiah hun eng emaw chen kal tih a sawi a. Amaherawhchu, Congress party MDC zawng zawngte chuan anmahni thlangtu mipuite phatsanin anmahni sahimna tur nia an ngaih BJP-ah an tlanchhiatsan tak vek thu sawiin, “Hetianga politics-a mahni sahimna ringawt ngaihtuah avanga mahni party mipuite phatsan hi democracy-ah chuan thil thiang lo, dan kalh tlat a ni,” a ti.
C Lalramzauva hian Congress party atanga BJP zawma, lalna leh thuneihna duha MDC nih zui leh tumtute hi tun tum MADC BJP party atanga ram leh mipui kaihhruai hna thawk tura BJP party-ten candidate a an vawrh chhuah leh takte an nih thu a sawi a. Heng mite hi hi MADC hnuaia hnathawkte (employee) hlawh hi budget pum pui atanga zaa 93 vel zeta a nih chhoh tawh lain, thawk miah si lo, thawk anga ziah lan (ghost employee an tih mai) mi pali zet chu Finance & Account Department (CEM) enkawlna hnuaiah ringawtah pawh an awm a, heng mi palite hi LDC anga thla tin Rs 38,109 lai hlawh late an nih thu te, Financial & Budgetary Control-ah pawh hian Mizoram Autonomous Fund Rules, 2010 chu nasa taka an bawhchhia thu te, development work hrang hrang an kalpui danah pawh hna thawh that a tlem thu te, Land Revenue Department hnuaiah pawh fel lo taka duhsak zawngte ram inpek an nih thu te a sawi.
MADC-a sorkarna chelh mektu, BJP lemchangte hian BJP kalphung leh hmalaknate hi a tha an tih em avang ni loin, anmahni sahimna zawnga Congress party MDC ni tura party mipuiten an thlan tlin ni chung sia anmahni thlangtu mipuite an uiresan ta mai hi ram mipuite tan belhzui tlak an nih tawh lo thu C Lalramzauva hian a sawi bawk.