Aizawl: Congress President Lalsawta chuan an party chu hnam tlem zawk leh harsa zawkte ngaihsaktu a nih thu a sawi.
Mara Autonomouse District Council (MADC) inthlan campaign tawp ni, nimin khan Lalsawta hian Siaha khawpui chhung hmun hrang hranga vantlang inkhawm buatsaih thu a sawi a. “Min hringtu central lama Congress hruaitute pawhin minority-te a hmangaih a, kum 1952-a district council kan neih tirh khan Prime Minister Jawaharlal Nehru chu district council pualin Mizoramah a lo kal vang vang a ni. BJP hian kum 8 tehmeuh sorkarna an chelh hnuah MADC an ngaihsakna lantir turin Siahaah Narendra Modi a lo la kal miah lo a ni,” a ti.
Lalsawta hian Congress party chu hnam tlem zawk leh harsa zawkte ngaihsaktu a nih thu sawiin, “A ni reng bawk ang. BJP chuan kan hnam leh sakhuain dan leh hrai, inkaihhruaina fel tak kan lo neihte min palzutsak mek a, an candidate-te an tlin theihna turin BJP leh a thawhpuiten mipuite harsatna remchanga lain pawisa hmanga min run an tum leh mek. Lo inralring ula, pawisa hmanga in hlutna leh dikna lei theih in ni ve lo tih lantir turin ka ngen che u ni,” a ti bawk.
MNF party chungchang sawiin MPCC president hian, “MADC area chhungah EE pawh in nei lo, Engineer-in-Chief pawh in nei lo, hna lian engmah in thawk ve thei lo, tih hi MNF thutlukna a ni a, chu chu MNF-in a en dan che u a ni,” a ti a. Tanpui an ngaih laia Aizawlah awm thup, vote an mamawh huna an hnena awm ve chauhte hian an ngaihsak tak tak loh thu leh, chutiang chu inngaihsakna dik a nih ngai loh thu a sawi a. Congress erawh chuan tuna mipuiin harsatna nasa tak in tawh mekna health care chu a hma anga mumal taka kalpui tura an siam that tur thu te, mipuite tan eizawnna ngelnghet, kuthnathawktute leh thalaite kal kawng tur pawh mithiamte nen ruahmanna siam tura hmalak a nih tur thu a sawi.
MPCC Treasurer Zodintluanga Ralte pawhin thu sawiin kum 20 tal tap Mizoram chu tah leh hathialnaah MNF-in a hruai luh tih a sawi a. “MNF sorkar hmasa (1998-2008) chhungin Mizoram a ral muang lo. Khawpuiah hel an huangtauin, Aizawl khawpuiah hel pawlin training-te an nei hial a ni. Mipui pawisain mipui a thleng phak lo a, hripui avanga an dinhmun a chhiat em em laiin chief minister-in a unaute pawisa nuai tam tak a kawlsak a ni. Hetiang dinhmun him lo leh manganthlak tak laka sum leh pai dinhmun siam tha a, ram mipuite manganna chhanchhuak turin Pathianin Congresss party a tungding leh mek a ni,” a ti.
Mara District Congress Committee President S Hiato, ex-minister pawhin thu sawiin, MADC-a sorkar mek, Congress chu MNF-in namthluk tuma an beih reng avangin anmahni inchhanhim nan BJP an zawm ta vek a. Tlin beisei si lo, mi dang tihchhiat tumin ZPM an hmanhlel bawk mah se, MADC hmangaihtu leh chhantu Congress party chu Lalsawta hoin nasa takin Pathianin a din thar leh mek thu a sawi.
Congress party street campaign-ah hian President Lalsawta leh Zodintluanga Ralte, MLA bakah Lalrindika Ralte, MLA, K.T Rokhaw, MLA, H. Rohluna, S.Hiato, Lalrobiaka leh H. Zothangliana, Chalrosanga Ralte leh MPCC hruaitu dang thahnem tak an tel a ni.