- Mahmuaka Chhakchhuak
Mizo zingah chuan Saum hi sawifiah hran a ngai tawh awm kher awm lo e. Tunhma lamah kha chuan In tinin kan nei fur thin a ni a, tunah erawh mi tam zawkin mei thuk kan lo uar tak lohah hian saum urna tur kan nei tha lo te pawh a ni ang a, bazar zuarte an lo awm bawk nen kan lei zawk ta mai thin a. Cheng 10 man lek lek emaw te hian kan lei a, a siamtute lahin tam tham tak tak an siam ngai lo ni berin a hriat bawk. Tunhnai khan Aizawl mi pakhat chuan saum hi zawrh turin a buatsaih mai piah lamah Foreign lam thleng thlengin a supply thin thu a sawi a, chhuanawm ka ti hle a ni.
Tunlai khawvelah chuan sum chang thei apiang hi a hlu mai a, nimahsela sum hmuhna kawng erawh a thianghlim tur a ni. Chutih rualin sum um lutuk pawh a awm thei tho bawk ang. Kan pi leh pute hunlai atang daih tawha kan lo neih reng thin – Saum chu sumah chantir theih a niin kum tam la liam lo atang khan zawrh chhuah a lo ni tawh a, tunah chuan ram dang thleng pawha zawrh chhuah alo ni ta a ni. Saum ei tlaka zawrchhuah theiha buatsaih turin formula har vak a awm lo a, kut hmui leh hmui lo erawh a awm ngeiin a rinawm thung a. Hetianga ram hran daiha zawrh chhuah theih tura mizo zinga hmala kan lo awm ta hi thil ropui tak va ni hluai lo mahsela chhuan tlak a ni reng reng mai. Pathian zara tluang taka a beih zel chuan zoram khawvelah a hming pawh kan la hre lar lehzual ngei ang a, saum atang ngeiin hlawkna nasa tak a hmuh ngei pawh a beiseiawm.
He ramdanga saum thawnchhuak kan sawi mek hi tlangval kum 35 mi emaw lek a ni a, saum a zawrh hma lam pawhin ei hmuhna turin hna a thawk reng reng bawk a, mi chhuanawm tak a ni hrim hrim. Tunlaia mizo thalai tam takin eizawnna an haichham laiin ani chuan nitina sum a lakluh theihna turin eichawp dawr a siam a, a dawr siam chu ti tawpin pangpar khawi tur chi te, mitthi kuang chunga dah tur chi te a siam a, thahnemngai taka a beihna chuan mi hriat alo hlawh phahin pangpar a siam lai reng chuan decoration lam buaipui bawkin a sum hmuhna kawng a zauh zel a. Innei thar turte leh pass lawmna hmun tur chei tur tein an ko reng a, chu chauh chu duhtawk loin food processing lam a siam leh bawkin social media lamah a zuar chhuak reng bawk a, chingal ngei pawh zuar chhuak tawh bawkin tunah hei saum ngei pawh chu a rawn zuar leh a, amah biangbiak a nuam hrim hrim bawk nen chuan duhsaktu hmu zelin a nitin sum lak luh hi nitina mi hnuaia inhlawh te ai chuan a tam zawk ngeiin a rinawm.
He tlangval chanchin hi kan han sawi ta chiam a, amah ang hi midang an awm tho ka ring nain ani hi kan hriatchian vangin heti hian kan han sawi lang chauh mai a ni a. Mizo thalai zingah hian hetianga mahni intodelh tum hi engzat tak awm ang maw ka ti a ni. He tlangval hi mi ngainatawm tak a nih hrim hrim bakah kohhran bel tlat mi ala ni zui bawk a, makpa atana iai-awm loh tak leh nu leh pate tan pawha rintlak tak tur mi niin alang. Sum leh pai kan duh a, thil tha leh mawi kan duh ve zel bawk vangin leh mamawh kan neih belh zel bawk vangin chungte chu kan sum neih sain a tlin siloh chuan sum leh pai tam zawk kan zawn a ngai ta a, nimahsela mizo thalai zingah hian thianghlim lo taka sum leh pai hailut hi sawi tur an awm fo mai bawk si hi a pawi ngawt mai. Mahni zahawmna pawh pawisa lo khawpa sum leh pai zawngte, mahni taksa ngei pawh hralh duh khawpa sum leh pai umte, chunglam malsawm loh zawng deuha sum leh pai zawngte pawh kan mizo zingah an awm nual nia hriat a ni te hian kan kristianna hmel a ti bal ta hial a nih hi. Vaihoin ‘mizo chu an eiru ang chu kristian an ni alawm’ tia min sawi te hi a thinrimthlak a sin.
Sum leh pai te hi a hlu tehmeuh mai, nimahsela kan lakluhnain a zir loh chuan chunglam hian a hmanralna tur hi a lo hre khawp mai a, kan lakluh ang ang hi hnemhnanna awm loin a liam tir nghal zung zung mai thin. Hausaknate hi sum leh pai neih tamah emaw chauh kan teh tlatna hian kan khawtlang nun a ti chhia tihte hi hria ila a tha ngawt a ni. Nimahsela chutih rualin sum leh pai nei na na nate chu an sum lak luhna bawlhhlawh zia hrereng mah ila kan dah chungnung tho si hi kan mizo nunphunga thil tha lo ber zing ami a ni hial ta ve ang. Hetianga dik lo taka sum leh pai lalutte kan hnualsuat ngam loh chhung chu kan ram hi a kal dik ngai lo ang a, kan kristianna ngei pawh hian hmun sang zawk leh zau zawk hi a thleng ngai hek lo ang. Vawiin atang hian hetianga eiru kan hriat emaw, dik lo taka sum la lut kan hriatte hi chu kawm lo hmak ila, an fanu te ngei pawh chu kan mizo tlangval te hian ngaizawng duh miah lo sela, an tlangvalte pawh inlengah duh miah lo ngam ila kan khawtlang hi alo thianghlim sawt ngeiin kei ka ring tlat a ni.
Zahawmna hi sum leh pai neih leh neih loh emaw chauh kan tih tlat vangin dik lo tak pawha sum lakluh kan duh phah ni te hian a hriat a, saum zuar kan sawi tak erawh hi chuan zahawmna lam thlir hmasa loin intodelhna atan zawk a sum leh pai zawngin saum a zuar a, nakin lawkah chuan mi zahawm tak pawh ala nih ngei a rinawm zawk bawk. Hetiang nun hi a duhawm a, chunglam malsawm duh zawng pawh a ni ngei ang. A sum lak luh pawh ho mai mai atan a hman a rinawm lohin tangkai taka a hman ngei pawh a rinawm tlat a. Chu chuan nun hlimna a thlenin chunglam pawhin malsawmna tam zawk a vur ngei pawh a rinawm tlat si a.