Delhi sikula zirlai naupang nu leh pate chuan khaw lum uchuak tak avangin sorkar chu sikul kai hun tidanglam tur emaw, nipui chawlh hun sawn hma emaw turin an duh tih news agency PTI chuan a tar lang.
Ram khawpui berah hian sikulte chuan khaw awm dan uchuak tak avang leh Covid-19 kai an pun leh deuh avangin pawn lama thiltih lam an inthunun leh tan mek sa a. Hetiang hi ni mah se nu leh pate chuan khaw lum leh ni sa lutuka naupangte chhuah chu an duh lo.
Delhi Parents Association President Aparajitha Gautam chuan PTI hnenah naupangte hi tlai dar 3:00 hnu lamah an haw thei chauh va, khaw lum vanglaiin khawlaiah an kal tihna a ni tih a sawi a. “Delhi sorkar hnenah dtate dang anga sikul hun sawn tur emaw, nipui chawlh sawn hma turin kan ngen a ni,” a ti.
Kar hmasa khan sorkar laipui chuan khaw lum lutuka inkaihhruaina, tih tur leh tih loh turte a chhuah a. State leh union territory-te chu damdawi leh hriselna lama mamawhte inring tur te, tui in tur leh hmun lum zual laia intihdaihnate inring turin a ti bawk.
Delhi thenawm, Haryana leh Punjab-ah chuan sikul kai hun emaw, nipui chawlh hman hun emaw an sawn tawh a, hei hi naupangten khaw lum an tawrh nep deuh nan an ti.
Thawhtanni khan Haryana Education Minister Kanwar Pal Gujjar chuan Twitter-ah May 4 atang chuan mi mal leh sorkar sikul zawng zawngah zing dar 7:00 leh chhun dar 12:00 inkarah an tih tawh tur thu a sawi a. He thutlukna hi naupangte hriselna leh khaw lum lutuk laka an himna tur a nih thu a sawi.
Punjab Chief Minister Bhagwant Mann pawhin Zirtawpni pawh khan sikulte nipui chawlh chu sawn hmain May 14-ah tan a nih tur thu a sawi a. Hei hi nu leh pa leh zirtirtu tam takte duh dan ang a nih thu a sawi.
Uttar Pradesh, Odisha leh West Bengal te pawhin sikul kai hun chhung leh nipui chawlh hun chungchangah hian hma an la tawh bawk.
Delhi-ah bik erawh chuan hetiang ruahmanna hi an la siam lo va. Thawhlehni khan 40.8°C a ni phak.