aIZAWL: Lunglei district Congress committee (LDCC)-in nimin khan Lungleia Congress Bhavan-ah Municipality zirhona an buatsaih a. LDCC President C Lalhminglia- na’n Lungleia Municipal Council (LMC) din tur atan an inbuatsaih tan tawh tih sawiin, LMC inthlana ding tur mi tha an dap mek thu a sawi.
LMC inthlana Congress party atanga ding tura an mi duh te an ding thei vek a nih chuan hnehna an chan ngei a beiseiawm thu LDCC President chuan a sawi a. Municipal chu hmasawnna leh thil tha tak a nih rualin, miharsate tan NREGS a awm tawh lo tur erawh a uiawm dawn hle nia a lan thu leh miharsa zawkte hmakhua chu engtin nge ni ang tih ngaihtuah zui ngai tak a nih thu a sawi bawk.
Lungleia Municipality zirhonaah hian resource persons pahnih – Aizawla municipal ro- relna kalpui a nih ata- nga a dinna ward-a tun thlenga la tling Rosiamngheta leh Congress party thupuangtu Dr. Lallianchhunga te hman an ni a. Rosiamngheta chuan Municipal ah chuan sorkarin subject a pek bak tih theih a neih loh thu sawiin, “AMC inthlanah khan party pakhat chuan sorkarin subject min pek bak manifesto atan an nei a, a sawia tha tak, mahse, tih theih si loh, mipui hip tumna leh dawt hmanga mipui rilru hruaikawi tumna a ni a, a tha lo hle a ni” a ti.
Rosiamngheta chuan “LMC inthlanah pawh sorkarin AMC-a subject a pek mil deuha manifesto duan a ngai anga, chu pawh chu sorkarin LMC ah a pe kim dawn nge, pe kim dawn lo a hriatloh” a ti a. “LMC-ah sorkarna kan siam a nih chuan Congress party chuan mipui tana phurrit lo thei ang bera kalpui a ngai ang” a ti bawk.
MPCC thupuangtu Dr. Lallianchhunga’n Aizawla municipal ro- relna pian chhoh dan te sawiin, MNF sorkar laiin AMC chu a thu chauha din a nih thu leh inthlan pawh huaihawt a nih loh thu a sawi a. Vai rama an dan hman entawna duan pawh Mizo khawtlang nun nen a inmillo a nih thu leh Bawngtawlailir (bul- lockcart) atanga chhiah (tax) lak dan tur thlenga lakchhawn a nih thu sawiin, Mizorama hman chi a nih loh thu a sawi.
Congress sorkarin review committee dinin, The Mizoram Municipalities Act, 2007 chu Ministry of Urban Development-in a duan, Model Municipal Law behchhana siamthain, Mizo khawtlang nun mil thei ber tura a duan that thu Dr. Lallianchhunga chuan sawiin, hei hi Congress sorkar lai bawk kum 2009-ah Mizoram legislative assembly-in a pawm tak thu a sawi a. “Tunah hian Congress sorkarin AMC-a thuneihna a pek bak kha MNF sorkar hian thuneihna dang a la pek belh lo” a ti bawk.