Aizawl: Mizorama mi retheiten PM Scheme an dawn tur ang an la dawn loh thu leh he scheme hi MNF kaihhruai state sorkarin a bawhzui duh loh tih Uttara Debbarma, BJP National ST Morcha Secretary, i/c Mizoram chuan a sawi.
BJP ST Morcha inkhawm nimina BJP party pisaa neihah thusawiin Debbarma chuan, “Tun hunah hian PM Scheme tam tak hi Mizorama mi retheiten kan dawn tur ang kan la dawng lo a, PM Scheme tam tak hi state sorkar hian an bawhzui duh lo a, BJP faknaah emaw an ngai nge ni dawn ni?” tiin, central atanga PM Scheme kaltlanga mi rethei zawkten hamthatna hrang hrang a nihna anga an dawn theihna turin BJP sorkar hi Mizoram hian a mamawh thu a sawi.
Debbarma chuan mi retheih tam takin ni tina mamawh ei leh bar awlsam zawk leh man tlawm zawka an nei thei chu state sorkar hmalakna ni loin central sorkarin mi retheite tan state sorkar kaltlangin a pe tih a sawi a. “Mizoramah pawh heng PM Scheme hrang hrang dawng tam tak in awm ka ring a, mi thenkhat chuan state sorkar thil tih emaw pawh kan ti mai thei; nimahsela, heng zawng zawng hi PM Modi kaihhruai BJP sorkarin mipui tana a hmalakna leh a thil tih a ni tih Mizoram mipui hriatah ka sawi duh a ni,” a ti.
BJP hi party leh mi thenkhatten Kristianna nen inmil lo anga an sawi leh Kristiante tiduhdahtu anga an sawi thin hi thudik lo leh belhchian dawl lo a nih thu a sawi a. BJP hian a hnathawh leh a tum ber chu, ‘Mi tinin an chanvo an chang tur a ni’ tih a nih thu sawiin, “Tun hunah MLA pakhat chauh nei mah ila, 2023 MLA inthlan ah erawh MLA 30 lai kan nei thei a ni ni tih hre chungin theih tawp chhuahin hma i la ang u,” a ti bawk.