India rama tun hnaia sakhaw hunpuia tharum thawhna thleng a reh thei lo va, Thawhlehnia Muslim-te hunpui, Eid-ah pawh buaina chhuak lehin Rajsathan-a Jodhpur-ah chuan hmun tam takah curfew puan niin internet pawh tihtawp lailawk a ni.
Khualzinte tlawh nasat tak, Jodhpur-ah hian tharum thawhna hi Eid hma zan, Thawhtanni zana chhuak tan a ni a. Pawl pahnihten an sakhaw flag tar inchuhna atanga buaina hi chhuak a ni.
Muslim-te Eid hun hi Jodhpur-ah hian Hindu sakhaw kût pakhat, ni thum chhung lawm thin, Parshuram Jayanti nen a inrual a, sakhaw pahnih zuitute hi an sakhaw flag tarna an inchuhna atangin an intibuai ta a ni.
Police chuan zan dar 11.30 velah mi thenkhatin khawpui laili leh sumdawnna hmunpui ber, Jalori Gate an tiha flag an tar atanga intan niin an sawi.
Zan lama buaina chhuak hi mittui tlakna hlo hmanga hnawh darh an nih hnuah, Thawhlehni zinga tawngtaina hun hman zawhah helai velah bawk hian buaina a chhuak leh a. Intibuaite hi lungin nasa taka intawngin an inau el nasa hle bawk.
Buaina chhuakah hian mi eng emaw zatin hliam an tuar a, police pali pawhin an tuar ve bawk.
Jodhpur Police Commissioner Navajyoti Gogoi chuan boruak thunun tawh a nih thu thuthar lakhawmtute a hrilh a, flag march an nei reng tih a sawi a. Hungna siamin venhimna khauh taka kalpui a ni tih an sawi bawk.
Jodhpur-a Udai Mandir, Nagori Gate, Khanda Phalsa, Pratap Nagar, Dev Nagar, Soor Sagar leh Sardarpura police station huam chhungah chuan curfew puan niin hei hi Nilaini zanlai thleng awh tura tih phawt a ni tih police control room chuan a sawi.
Buaina chhuak zel tur dan nan leh thu dik lo thehdarh a awm loh nan internet service tihtawp lailawk nghal a ni bawk a. Eid hmang turte pawh police venhimna nen chauhva thil kalpui theih a ni.
Rajasthan Chief Minister Ashok Gehlot chuan buaina chhuak chungchangah hian Thawhlehni vek khan thutkhawm hmanhmawh a ko nghal a. “Jodhpur-a Thawhtanni zana thil thleng kha a vanduaithlak tak zet a. Mite unau anga inen vekna hmunah hetiang buaina hi a chhuak a, mipuite hi muanna kengkawh turin ka ngen a, hetiang boruak hi tual chhung mite duhzawng a ni,” tiin news agency ANI hnenah a sawi.
Gehlot-a hian political party hrang hrangte pawh hetiang buaina lakah hian tanruang turin a sawm a, heng lai vela mipui aiawha thlan hruaitute chu zaizap thiam turin a ngen a. Party hrang hranga mite chu pumkhat taka awm turin a ngen.