Uttar Pradesh-a police pakhat chu hmeichhe naupang kum 13 miin police hnena miin an pawngsual rawn thu thlen tuma a kal a lo pawngsual veleh nia puh a nih avangin a tlan bo mek.
Police tlan bo mek lakah hian thubuai ziah luh a ni a, a hna atanga chawlh lailawktir (suspend) a ni nghal bawk tih police hotu sang chuan a sawi.
Hmeichhe naupang hi thla hmasa khan mipa paliin an pawngsual rawn nia sawi a ni.
Hetiang thil a thleng hian mi tam tak a tithinrim a, social media-a thinrim taka âng chhuak pawh an tam hle.
Police hnena a pain a thlen dan chuan mipa paliin a fanu hi an thenawm, Madhya Pradesh state-ah hruaiin ni li chhung an pawngsual a. An khua, Lalitpur district-ah dah let lehin an tlan bo zui ta a ni.
A tuka a ni nena police station-a pawngsual a nih thu thlen tuma an kal chu officer in charge chuan a lo pawngsual veleh bawk niin NDTV news channel chuan a tar lang.
Lalitpur district police chief, Childline charity-in a pisa an panpui, Nikhil Pathak chuan thuthar lakhawmtute hnenah naupang hi thil awm dan a zawt a. “Ka lo hria a, thubuai ka ziak lut ngei ang,” a ti.
Hmeichhe naupang pawngsual rawn leh a hnua police-in a pawngsual zui leh nia sawi a awm hnuah hian India rama mihring cheng an tamna ber state-a dan leh thupek kenkawh dan chuan sawi a hlawh nghal hle.
Congress party hruaitu, Priyanka Gandhi Vadra chuan, “Police station-ah pawh hmeichhiate an him loh chuan khawiah nge complain an thehluh tak ang?” tiin Twitter-ah Hindi-in a tar lang.
“Hmeichhiate tan police station a him zawk theih nan Uttar Pradesh sorkar hian hmeichhe tam zawk a dah thei ngang lo em ni?” a ti bawk.
India, pawngsual leh hremna
India ramah hian pawngsual leh hmeichhiate laka mawi lo taka chetna avanga thubuai hi a tam hle a. December, 2012-a khawpui ber, Delhi-a bus chhunga nula pawngsual rawnna rawng tak a thlen hnuah khan miin an ngaihven zual a, hemi tuma hmeichhia hi pawngsualtute kutthlakna avangin a thi zui.
He thil thleng hian khawvel pum a luah a, Delhi-ah duh lohna nasa taka lantir a ni a. India pawhin hetiang lam kaihhnawiha dan bawhchhiate hremna dan khauh zawk a siam a. Delhi-a thil thleng titu mipa palite chu kum 2020 khan tihhlum an ni ta nghe nghe.
Hremna na zawk siam ni mah se India-ah hian pawngsual thubuai sang chuang a awm ziah tho va. Chhinchhiahna thar ber, kum 2020-a mi-ah chuan hmeichhia leh hmeichhe naupang pawngsual 28,379 zet an awm tho va, minute 18 dan zelah pawngsualna thleng ang a ni.
Hetiang lam a tawp theih nana beitute chuan a tak takah chuan hei aiin a tam daih zawk tur thu an la sawi bawk.
India-ah pawh Uttar Pradesh hi hmeichhiate laka thubuai a awma thuneitute thil kalpui dan fel lo leh chak tawk lo avanga sawiselna a nasatna thin hmun a ni.
Kum 2020 khan he state-ah hian nula kum 19 mi chu pawngsual rawn leh nasa taka sawisak a nih hnuah a thi tih sawi a awm a. Police leh thuneitute chuan a ruang hi zan laiah, a chhungte pawh rawn hmasa lovin an hal ral.
Finfiahna chiang tak a awm nia sawi ni mah se thuneitute chuan pawngsual a nih loh thu an sawi tlat bawk.