Kan sorkar dawn, nakkum MLA inthlanah pawh kan tel loin sorkar a piang thei dawn lo : BJP president

AZL: Mizoram State BJP President Vanlalhmuaka chuan MADC inthlanna neih mekah BJP-in sorkarna an siam tur thu leh nakkum MLA inthlanpui lo awm turah BJP tel loin sorkar a pian theih dawn loh thu a sawi.
Nimin khan Lunglei Press Club-ah Vanlalhmuaka hian thu thar theh darhtute a kawm a. Tun tum MADC inthlan hi BJP-in a tak taka inthlan a hmachhawn hmasak ber tum a nih thu leh candidate pawh 24 lai an neih thu a sawi.
“Central minister hoin theihtawp chhuahin campaign pawh neih a ni a. BJP-in a vawi khat nan sorkarna kan siam ngei ka ring a. Seat 25 awmnaah seat 14 atanga seat 18 an lak ngei ka ring,” a ti.
MADC mipuite an lungawi loh thu sawiin Vanlalhmuaka hian, “Central sorkarin Panchayat awm lohnaa DRDA a tihtawp takah khan, Mizoram sorkar chuan MADC-ah a nih dan tur ang taka thil a kalpui loh avang leh Sixth Scheduled-a autonomous district council dinhmun siam thatna tur chungchanga sorkar laipuiin state sorkar-te ngaihdan a lakah, Mizoram sorkar chuan autonomous district council-te thuneihna anga kalpuia an thuneihna chhuhsak zawngin hma a lak avangin an lungawi lo hle a ni,” a ti bawk.
Vanlalhmuaka hian RTI hmangin MADC huam chhunga sum leh pai hman tur Rs. nuai 4,000 zet mai ministry-in a pek pawh an kut a thleng lo tih hmuh chhuah a nih thu a sawi a. MNF sorkarin hetianga a kalpui mai hi autonomous mipuite an lungawi loh thu leh, state sorkar atanga sum pek tur thlengin sorkarin inthliarhranna a kalpui avangin mipuiin MADC inthlanah hian BJP hi thlan tlin an duhin, MNF chu an hriat chian avangin hnawl an duh tih a sawi.
MNF sorkar hotute sorkar laipui dawra Delhi-a an kalin an BJP hle a, Mizoramah erawh BJP phoro tumtu an ni tih sawiin, “Hei hi central BJP hotute chuan chiang takin an hre tawh a. Tunah chuan an khawsak dan pawh a harsa chho tawh hle a ni a,” a ti a; MNF party tan MADC inthlanah chance a awm loh thu a sawi bakah, sorkar intawm siam ngaih thutah pawh MNF chu an thawhpui dawn loh thu a sawi bawk.
Congress party leh ZPM party chungchang pawh sawiin, “Congress party tan pawh seat hnih thum bak a tam berah a beiseiawm loh a. ZPM party-in boruak an nei lo a, beisei tur an awm lo a. Mipui tan BJP sorkar tha tak a piang dawn a. Kum 2023 MLA inthlanpui lo awm turah BJP tel loin sorkar a piang thei dawn lo,” Vanlalhmuaka hian a ti.
He hun hmanpuitu, BJP MLA BD Chakma pawhin thu sawiin MADC inthlanna neih turah hian Supply Minister K Lalrinliana chu model code of conduct bawhchhe khawpin hma a la tih sawiin, buhfai an sem tum leh an phurhna lirthei 407 thlengin mansak an nih avangin, minister hi insawifiah tura tih a nih thu a sawi a. Ani bakah RD Minister Lalruatkima pawh MADC area atanga hnawh chhuah ngaia a awm thu a sawi a ni.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427