Maruti Suzuki lirthei man tlawm ber ni mek, Alto chu a chhuan thar model tur, New Generation Maruti Suzuki Alto chu kumin kumtawp lamah a chhuah hman beisei a ni a, he lirthei thar turah hian inthlak hrang hrang a awm nual beisei a ni bawk.
Maruti Suzuki hian tunhnaiah lirthei chhuak mek a model thar leh hmel thar te an tichhuak nual a. Maruti Suzuki hian tunhnai teah pawh Baleno thar, Ertiga hmel thar leh XL6 thar an tichhuak bawk a. Hei hi kan lo tarlang theuh tawh bawk a ni. Maruti Suzuki hian kumin ral hmain kumtawp lamah lirthei chi thum tihchhuah an tum niin a lang bawk a. Hei erawh company atangin thuchiang lehzual te pawh a lo chhuak thuai awm e.
Maruti Suzuki hian Brezza thar hi tun atanga reiloteah an tihchhuah beisei a ni a. Hei bakah hian midsize SUV thar an tihchhuah thuai tawh beisei a ni bawk. He midsize SUV thar tur hi a enchhinna – trial version pawh company lam chuan a codename-ah YFG tih hming puin an lo tichhuak tawh a. Ramchhunga hunpui hrang hrang lo thleng chho tur rualin an tihchhuah rin a ni. He SUV thar tur hi Toyota nen tangkawpa an duan a ni a, Hyundai Creta leh Kia Seltos te a rawn el dawn a ni.
Alto thar?
Maruti Suzuki New Generation Alto pawh hi lirthei dangte ang bawk khian a lo chhuah ngei beisei a ni na a, a chhuah hun tur hi company lamin an la puangzar lo a. Kumin kumtawpah a chhuah theih beisei a ni.
New generation Alto hi Wagon R thar ber, S-Presso leh Celerio tharah te kan hmuh ang HEARTECT platform nghahchhana duan a ni dawn a. Heti a nih chuan a hma aiin he lirthei hi a lian tawh zawk dawnin a lang a ni. An enchhinna thlalak darh atanga a lan danin Alto thar tur hi a hma aiin a arh zawk a, a sang zawk bawk a, hei hian a wheelbase pawh a thui zawk dawn tihte pawh a tilang chiang awm e. HEARTECT platform hmang ngai lo, hmang thar ho hi a thui zawk zel a ni. Hetihrual hian he Alto thar tur hi zang si, petrol heh bawk si loa an duan beisei a ni bawk.
New Generation Alto lo chhuak tur hi a hmaa chhuak nena khaikhin chuan design lamah a danglam dawrh dawn a. A hmaa a pian leh hmelhmang paih fithla thak siloin, a hma aia danglam dawrh siin he lirthei thar tur hi design a ni a. A hmalam hmel a danglam ang a, grille lian zawk, headlamp lian zawk sweptback design an tih a nei ang a, bumper thar a neih hmel bawk. Hei bakah hian fog lamp housing thar leh clamshell bonnet a nei dawn bawk a ni.
A sir lam, side profile chu a hmaa mi nen a inang viau dawn a, hetihrual hian a hma ai chuan a sang deuh dawn a. A ke bawrah pawh a hma aia hlai 14inch alloy wheel kan hmuh hmel bawk a ni. A hnunglamah chuan new generation Alto hian tailgate design thar a nei ang a, tail lamp lian zawk leh bumper design thar a nei dawn bawk a ni.
A chhunglamah chuan new generation Alto-ah hian eng nge awm dawn tih chiang taka hriat a la harsa a. Hetihrual hian cabin design thar hlak, design tunlai ber ber a rawn neih tawh beisei a ni a. A man to ber model noah chuan touchscreen infotainment system, smartphone connectivity awm tel bakah, keyless entry, semi-digital instrument console, power steering leh dual airbag te a awm dawn a ni.
A khawl lamah chuan new generation Alto hian Maruti Suzuki 1 litre khawl thar K10C dualjet 1.0 litre 3 cylinder petrol khawl a hman tawh beisei a ni a. Hei hian tunhnaia lirthei thar tam taka kan hmuh ang idle start/stop system a neih beisei a ni. He khawl hian 67bhp power leh 89Nm torque a pechhuak thei a. Hei bakah hian a hmaa 800cc khawl (796cc), 3 cylinder petrol khawl, 47bhp power leh 69Nm torque pechhuak thei a neih leh hmel bawk. Transmission lamah chuan manual AMT gearbox te a awm beisei a ni a, CNG hmang pawh Alto thar turah hian awm leh ngei tura beisei a ni.