Paris khawpui pan tur Liverpool

UEFA Champions League final lut turin Liverpool in dinhmun tha taka dingin Spain an pan a. First half-ah nasa taka tihthaih an nih hnuah erawh a lawm zawkah an tang a, 3-2 in Villarreal lakah hnehna an chang a, 5-2 aggregate in an chak.
Reds hi first leg-ah 2-0 in Anfield-ah an chak tawh a, hei vang hian inrintawkna lian tak nen Spain an pan. Nimahsela Estadio de la Cerámica ah minute 41 chhungin an dinhmun tha nawhreh a ni a. Villarreal tantu mipui thawm ring tak karah goal hnih an chhuah.

Inkhel pahnih
Minute 3-naah Villarreal forward Boulaye Dia chuan goal hmahruai a khung a, Etienne Capoue ball pass chu goal-ah a khung. Minute 41-naah Liverpool barakhaih an ni nawn a, an midfielder Francis Coquelin chuan Capoue ball cross bawk goal-ah a khung.

Liverpool thawhlehna
Halftime a zawhin Liverpool an hrilhhai a, an insiamthat a ngai. Lehlamah Villarreal in goal ven uluk an tum a, an tawm tlat chu an tisual ve thung.
Reds in kumtira an lakluh, an season kallai tinung thartu Luis Diaz an dah lut a, an goal nawr a na sawt.
Minute 62-naah Fabinho-a’n an goal khatna Villarreal goalkeeper Geronimo Rulli kap karah a pet lut a. Minute nga hnu lekah Diaz chuan an goal hnihna a khung lehnghal.
Sadio Mane chuan an hnehna tichiang turin goal a khung belh leh bawk a, Liverpool in season nga chhunga a vawi thumna atan UEFA Champions League final an khel dawn.
Villarreal hi a tawp thlengin tang mahse inkhel tawp lamah Capoue chu yellow card a hmuh nawn avangin hnawhchhuah a ni a, tlem zawk an nih hnuah an tan thawh leh theihna a awm tawh lo.
Reds hian May 28 a Stade de France a final khel turin Manchester City emaw Real Madrid an hmuak mek.

A tawpah Liverpool bawk
English football club zingah Champions League, Premier League leh FA Cup chawi rual tawh an awm a, League Cup nen a pali a chawi vek thei erawh an awm lo. Liverpool hian kuminah hengte hi tih vek an tum.
Anfield a inkhel avangin mi tam takin Villarreal an dahbo a, mahse first half-ah Liverpool an mangang tak zet.
Nidang zawng aia tihsual ngahin Villarreal in Dani Parejo leh Gerard Moreno te hmangin goal an khung belh teuh.
Second half-ah erawh inkhel a danglam a, Fabinho hmanga goal an neih hnuah Liverpool in inrintawkna an neih belh sawt.
Liverpool boss Jurgen Klopp chuan, “Minute thum hnu a goal chhuah hi kan duhdan lehling chiah a ni a, kha vang khan an boruak a tha telh telh. Villarreal fak loh theih an ni lova, an coach, an team leh an inkhelhdan a tha.”
“Hetianga harsatna hi chu thleng thei a ni tih kan hria a, hringnunah chuan kan chunga thil thleng chingfel tura kan chetdan hi a pawimawh ber thin.” tiin an inkhel a thlirlet.

Leave a Reply

error: Content is protected !!

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427

Notice: ob_end_flush(): failed to send buffer of zlib output compression (1) in /home/thezozam/public_html/wp-includes/functions.php on line 5427