India khawpui ber, Delhi chuan khaw lum uchuak tak a tawrh hnu lawkah hmun thenkhatah ruah leh rial a tla a. Hmun thenkhat phei chuan thla chak angreng tak an dawng bawk a, thlifim thaw nen, khaw lumin a hmeh chauh tawhte a nuai harh.
Rohini, Pitampura leh Paschim Vihar-a chengte chuan Nilaini chawhnu dar 2:00 velah khan rial tla, ruah leh thli chak tak an dawng hlawm a. A hnu rei vak lovah South Delhi-ah a thawk zui bawk.
Mi tam tak chuan social media-ah ruah leh rial video leh thalakte chu thehdarhin kawngpui ro leh khu tak a len fai niin an tar lang hlawm.
Zing lamah khan India Meteorological Department (IMD) chuan yellow alert a tichhuak a, hetah hian vaivut thli, ruahpui leh rial a tla thei a, darkar khata km 50 vela chak thli a thaw thei bawk niin a sawi lawk.
A hnuah a aia sang hretin orange alert a pe zui leh bawk.
Met department hian rawng chi li hmangin khaw awm dan tur hi a hrilhlawk thin a. ‘green’ (hring)-ah chuan engmah inrin ngai lo a ni a, ‘yellow’ (eng)-ah ngaichan leh a hnua inhrilh that leh tur a ni a, ‘orange’ (serthlum rawng)-ah inrin tan a ngai tih niin ‘red’ (sen)-ah khaw awm dan uchuak tak a awm dawn avanga hma lak ngai tih a hrilh lawk thin.
Ruah thawk avang hian khaw lum lam pawh a ziaawm ta deuh va. Khawpuiin a rin ber, Safdarjung Observatory chuan a lum lai berin 38°C velah a awm thei dawn niin a tar lang.
A vawh lai berin 28.8°C ni turah an ngai a, heti chung pawh hian kum danga tun ang huna a nih dan pangngai aiin 4°C vel chuan a lum dawn tho tihna a ni.
Khawthlang lam atanga thli kalin India hmar lam hi a lut mek a, ni thum lo awm leh tur chhung hian chhum pawh a tam dawn niin IMD chuan a sawi lawk.
Ni li/ni nga lo awm leh tur chhungin khua pawh 4-5°C velin a lum belh thei a, khaw lum uchuak tak ang erawh thleng tur a awm rih lo niin an tar lang.