Aizawl: Thenzawl Forest Division DFO Lalbiakchama Chawngthu chuan nimin khan Ramhmul Damdawi Inah Thenzawlah Ayush Aapke Dwar a hawng. He hunah hian ramhmul damdawi Sunhlu leh Archangkawn tiak thahnem tak kut hnathawktute hnenah sem nghal a ni.
India ramin zalenna a hmuh kum 75-na lawmna, Azadika Amrit Mahotsav kal zelah nimin khan Directorate of Ayush hnuaia State Medicinal Plant Board buatsaihin Ayush Aapke Dwar programme hawnna hi Thenzawl Tualvungi Venga Integrated Ayush Hospital Conference Hall-ah hman a ni.
Khuallian, DFO Lalbiakchama Chawngthu chuan thu sawiin, “Mizoram khuanu siamsa ramhmul damdawi kan ngah em em a, hengte hi kan hlutin kan la hmang thiam tawklo niin a lang a, Mizorama ramhmul damdawite a hlutna inzirtira kan hlut thiam pawimawh a, kan rama nungcha leh ramhmul damdawi hlu tak tak ram danga sumdawn nana hmanga lak leh phurh chhuah thin a ni chu mipuiten ngaimawh nachang kan hriat tul a ni,” a ti.
He hunah hian Thenzawl leh a chhehvela ramhmul damdawi chingtute hnenah ramhmul damdawi Sunhlu leh Archangkawm tiak sem nghal a ni a, Sunhlu tiak 950 leh Archangkawm tiak 100 vel sem tura ruahman niin nimina sem bak pawh a remchan anga a ching duhte hnenah sem zui tum a ni bawk.
He hun hi Resident Medical Officer Dr. HT Zothanmawia’n a kaihruai a ni.