Reality show judge lar leh pop star ni bawk Melanie Brown (Mel B) chuan chawimawina a dawn hlu tak MBE chu amah anga In chhungkhura mipate kut tuar thin a hmeichhepui te tan a hlan, a ti.
Kum 1990s chhoa rimawi khawvela hmeichhe band lar ber tih ngam Spice Girl member, Scary Spicy tia hriatlar hi 2018 khan Charity Women’s Aid-ah patron member niin, hun rei tak a pasal lak atanga tharum thawhna vawi tam a lo tawrh tawhna atanga talchhuah hnu-ah a dinhmun anga ding te tan theihtawp chhuahin a penchhuak thin a ni.
MBE chawimawina hlu leh ropui tak hi Buckingham Palace-ah Duke of Cambridge hnen atangin a dawng. “Ka thil tih leh hnathawh vanga MBE dawn hi ka inbeisei ngai lo hrim hrim a, heit anga ka dawng ta hi keimah mai ni lo, ka hmeichhiatpui zawng zawngte tan a ni,” tiin a sawi.
“A bik takin, Covid-19 hrileng atang khan In chhung khura tharum thawhna leh kutthlak tuar hmeichhia hi an pung lehzual a, an harsatna hriatpui a, ngaithla a, chinfelsak theitu mamawh ngawih ngawih hi mi nuai tam tak an awm a ni,” a ti bawk.