Haryana-a toll plaza-ah Khalistani mi firfiak ni ngeia hriat mi pali man an ni tih police-in an sawi a. An kut atang hian silai, ralthuam leh puak thei dang thahnem tak man tel a ni a. Maharashtra-a Nanded leh Telangana-a Adilabad-ah te an thil phurh hi dah an tum a ni.
He thila mawhphurtu lian ber nia hriat, Gurpreet-a hi Pakistan lam nena inzawmna nei ni ngeia hriat, Rajbeer nen pawh an lo inhmu tawh niin police chuan an sawi.
Ningani khan Gurpreet-a leh a thuihhruai mi pathumte hi India-a ralthuam an tawlh lut tur man an ni ta tih police chuan an sawi a. An pali hian Pakistan hnuchhui pawl, Inter-Services Intelligence (ISI) nen pawha inhnamhnai tak nia hriat an ni.
Karnal-a Bastara toll plaza-ah zing dar 4:00 velah man an ni a, Delhi lam pan niin Toyota Innova SUV varah an chuang a. Mi dang pathum hi Bhupinder, Amandeep leh Parminder te niin Punjab-a mi vek an ni.
An chuanna lirthei hi Delhi-a inziak lut chu a ni a; mahse, a neitu ber erawh hriat theih a la rih ni lo thung.
An manna hmunah hian bomb sut thiamte pawh koh niin sipaiin an hman thin mini-rover nen an SUV chu dap a ni a, IED an lo kam rin avanga hetianga ti hi an ni.
Police chuan an mi man palite hian Pakistan lama awm, Harvinder Singh an tih chu bepawp rengin ani tirh hi an ni tih an sawi a. Ani hian drone hmangin Pakistan atangin ralthuamte hi India ramah a chhawp lut a, sem darh turin a tir thin nia ngaih a ni.
An pali hian India ram hmun hrang hrangah improvised explosive device (IED) an sem kual thin nia hriat a ni a. A hma pawhin hmun hnih velah an lo dah tawh nia hriat a ni.
Ralthuam an mansak tel zingah hian tualchher pistol, a mu 31 leh IED an dahna thir bawm pathum a tel a. Rs. Nuai 1.3 an lo kawl bawk.
“Tuna hriat theih chinah chuan anni hi Innova hmang hian ralthuam leh puak thei dangte phura sem darh kual \hin an ni a. Tun tumah hian Adilabad, Telangana pan an tum a ni,” tiin Karnal Range Inspector General of Police Satender Kumar Gupta chuan news agency PTI a hrilh a. “Court-ah hruaiin police kutah an awm rih ang a, thu zawh fiah an nih hnuah thil a chiang lehzual thei ang,” a ti.
“Puak thei, RDX ni ngeia hriat thir bawm pathum bakah pistol leh a mu 31 man tel a ni,” a ti.